Qazaqstannyń jetekshi infektsionist dárigeri, meditsina ǵylymdarynyń doktory Dinagúl Baesheva KVI qaýpinen saqtaný úshin syrtqa sebepsiz shyqpaýdy taǵy da halyqtyń esine saldy, dep habarlaidy QazAqparat.
«Koronavirýsqa báribir – birinshi tolqyn ba, jiyrmasynshy tolqyn ba — aiyrma joq. Virýsqa jaz ba, kúz be, qazaqsyń ba, gúrjisiń be – báribir. Ol eń aldymen óziniń kóbeiý jolyn izdeidi. Mindeti - ókpege jetse boldy. Qazir koronavirýs JRVI nemese pnevmoniia arqyly belgili bolyp otyrǵan joq. Sol sebepti biz sozylmaly aýrýlary bar adamdarǵa mańyz berip kelemiz. Koronavirýs juqtyrǵan adamnyń burynnan bergi sozylmaly aýrýy qozyp ketýi yqtimal», - dedi Dinagúl Baesheva Densaýlyq saqtaý ministrliginiń Facebook paraqshasyndaǵy «Ministrlik habarlaidy» aidarynda.
Infektsionist dárigerdiń aitýynsha, osyǵan deiin Qazaqstan qatań shekteý sharalaryn engizgenimen ekonomikadaǵy týyndaǵan qiyndyqtarǵa bailanysty shekteý sharalaryn alýǵa májbúr bolǵan.
«Biraq úsh aidyń ishinde adamdar koronavirýsqa qarsy kúresti úirenip alatyndai ýaqyt boldy. Sebebi quryp ketken joq. Aramyzda júr. Qaýpin sezine júrýimiz kerek. Máselen, Ońtústik Koreiada bir monashka ǵana 300 adamdy juqtyrǵan. Iaǵni mundai oshaqtar kez kelgen ýaqytta týyndaýy múmkin. Sondyqtan bizdiń mindet – jaǵdaiǵa qarai beiimdelý. Qajettilik týyndamaǵan jaǵdaida syrtqa shyqpaǵan abzal», - dedi ol.
Dinagúl Baesheva Italiia men AQSh-taǵy jaǵdaidy umytpaýǵa shaqyrdy.
«Ol jaqtaǵy adamdar jinalyp alyp, virýsty kózge ilgisi kelmegendikten, ahýal qiyndap ketti. Al Singapýr, Tailand elderi aqyryn júrip, anyq basyp keledi. Sonda ǵana týǵan-týystarymyzdy, dostarymyzdy qaýipten saqtai alamyz», - dedi ol.
