Búgin Úkimet otyrysynda QR Indýstriia jáne infraqurylymdyq damý ministri Beibit Atamqulov Soltústik Qazaqstan oblysynda iske asyrylatyn ónerkásiptik jobalar týraly aitty, dep habarlaidy "Ult aqparat".
«Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi jospary aiasynda ministrlik jetekshilik etetin salalarda 36 is-sharany iske asyrýǵa jumyldyrylǵan. Ónerkásip salasynda Soltústik Qazaqstan oblysynda 2025 jylǵa deiingi keshendi josparǵa sáikes 4 500 jumys ornyn qurýmen jalpy somasy 376,5 mlrd teńgege óńdeýshi salada 20 jobany iske qosý josparlanyp otyr.
Biyldyń ózinde shamamen 1 myń jumys ornyn qurý arqyly investitsiia kólemi 28,9 mlrd teńge bolatyn 8 jobany iske qosý josparlanǵan. Óńirde óńirlik mamandaný keńeiip keledi. Iske asyrylyp jatqan jobalar esebinen aǵash óńdeý, farmatsevtika, qaǵaz, jihaz salasynyń damýyna serpin berildi. Óńirde laminattalǵan fanera men shpon óndirý boiynsha jobalar iske qosyldy», - dedi ministr.
Onyń aitýynsha, biyl óńirde aǵash-jońqa jihaz plitalaryn shyǵarý boiynsha jobasy engiziledi. Sonymen qatar, qaǵaz jáne karton óndirý boiynsha joba júzege asyrylyp jatyr.
Budan bólek, «Medeksport-Soltústik juldyz» jaýapkershiligi shekteýli seriktestiginiń dári-dármek shyǵarýdy josparlap otyr.
«Óńirde sondai-aq izotermiia vagondar shyǵaratyn Qazaqstandaǵy jalǵyz «Cool Infinity» jaýapkershiligi shekteýli seriktestigi kásiporny jumys isteidi. Biyl kásiporynda aýqymdy qaita qurý josparlanǵan. Shyǵarylatyn vagondar sany jylyna 300-den 1 400 deiin 4 esege ósedi. Ónimniń basym bóligi Resei men TMD elderine eksporttalatyn bolady. Soltústik Qazaqstan oblysynda 1-shi transformator zaýytynyń qurylysy aiaqtalýda. Bul kompaniianyń ónimderi eksportqa shyǵarýǵa baǵyttalǵan», - dedi B. Atamqulov.
Onyń sózine qaraǵanda, READY-BUILT FACTORY qaǵidaty boiynsha toqtap turǵan obektiler bazasynda jańa óndiristik alańdar salý 450 jumys ornyn qurýmen 21,6 mlrd teńge somasyna 4 jobany iske qosýdy qamtamasyz etýge múmkindik beredi. Tolyq qýatqa shyqqan kezde jobalardyń jyl saiynǵy óndiris kólemi 25,5 mlrd teńgeni quraidy. Sondai-aq, aǵymdaǵy jyly 30 mlrd teńge somasyna jyl saiyn 300 tehnika shyǵarýmen aýyl sharýashylyǵy tehnikasyn qurastyrý boiynsha jobany iske qosý josparlanǵan.
«Iske asyrylyp jatqan joǵary tehnologiialyq jobalar jastar úshin jáne jalpy Soltústik óńirdiń turǵyndary úshin sapaly, turaqty jumys oryndaryn saqtaýǵa ári qurýǵa, sondai-aq oblys halqynyń kóshi-qon aǵynyn odan ári tómendetýge múmkindik beredi», - dedi ministr.
Aita keteiik, búgin Úkimet otyrysynda QR Ulttyq ekonomika ministri Áset Erǵaliev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomikalyq damýynyń keshendi josparyn tanystyrdy.
