QR Indýstriia jáne infraqurylymdyq damý ministrligi Shubarkól kómiriniń Qyrǵyzstanǵa eksporty týraly túsinik berdi, dep habarlaidy QazAqparat.
«Shubarkól Kómir» AQ jyldyq kelisimshart negizinde Qyrǵyzstan kásiporyndaryna kómir jetkizedi.
«Aǵymdaǵy jyldyń aqpan-naýryz ailarynda Bishkek JEO-na 80 myń tonna kómir jetkizildi, al «Altyn korporatsiia» jáne «Gefest» kompaniialaryna 190 myń tonna kóleminde kómir jóneltildi. Ótken jyldyń 10 aiynda Qyrǵyzstanǵa 404 myń tonna kómir jetkizildi. Biyl otandyq naryqtaǵy kómirge degen suranystyń artýyna bailanysty Qyrǵyzstan baǵytyndaǵy kólem qysqaryp, 270 myń tonnany qurady, iaǵni 134 myń tonnaǵa az jetkizildi. «Shubakól Kómir» AQ-nyń aqparaty boiynsha, birinshi kezekte kómirmen qazaqstandyq naryq qamtamasyz etiledi», - delingen ministrlik baspasóz qyzmetiniń málimetinde.
Osy oraida Qyrǵyzstan baǵytynda kompaniia artyq qalǵan kómirdi jetkizý boiynsha ǵana jumys isteidi.
«Budan bólek, biyl Qyrǵyzstanǵa josparlanǵan kólemniń jartysy eksporttaldy. Osyndai úlgi boiynsha kompaniia kelesi jyly da jumys isteitin bolady. BAQ-da kóterilgen kelisim týraly aitatyn bolsaq, mundai kelisim jyl saiyn jasalady. Atalmysh kelisim 2021 jyldyń mamyr aiynda uzartylǵanyn habarlaimyz. Osy jyly Kelisimde kózdelgen kólemniń ulǵaiýy kútilmeidi», - dep atalyp ótken vedomstvo aqparatynda.
Aita keteiik, buqaralyq aqparat quraldarynda Qazaqstannan Qyrǵyzstan baǵytynda «Shubarkól» kómirin jetkizý kólemi ulǵaitylatyny týraly habarlanǵan edi.
