Indýstriia jáne infraqurylymdyq damý ministri Roman Skliar Nur-Sultandaǵy №31 mekteptegi saltanatty sharaǵa qatysyp, oqýshylar men ustazdarǵa jańa oqý jylynda sáttilik tiledi, dep habarlaidy "Ult aqparat".
«Mektep kezeńi - adam ómirindegi eń qyzyqty shaq. Mektep sizderdiń barlyq talanttaryńyzdy barynsha ashyp, jańa daǵdylardy ushtaýǵa kómektesedi. Búgin, mektep tabaldyryǵyn birinshi ret eń kishkentai oqýshylar - birinshi synyptyń búldirshinderi attady. 317 bala partaǵa otyryp, ózderiniń alǵashqy oqýlyqtaryn qoldaryna alyp, ártúrli ǵylymy bar, qyzyqty kezdesýler men jarqyn jańalyqtarǵa toly bilim álemi atty qyzyqty saiahatqa shyqty. Sondai-aq, osy oqý jyly 73 túlek úshin de erekshe bolmaq, olar da bir kezderi mektepke alǵash ret barǵan edi. Biraq eresek ómirdiń tabaldyryǵynda tur», - dep atap ótti vedomstvo basshysy óz sózinde.
Ministr joǵary tehnologiialary damyǵan qazirgi zamanda ár adam árdaiym jetilý ústinde ekenin atap ótti. Tek qajyrly eńbek qana HHI ǵasyrda jas órendi shyńǵa jeteleitini anyq.
«Mektepte jańa úmitter men oilar týady. Jas júrek dáriger, muǵalim, baǵdarlamashy, úlken sýretshi nemese Olimpiada chempiony bolýdy armandaidy. Siz oilaýǵa, týyndaǵan máselelerdi óz betinshe sheshýge, intellektýaldy jáne rýhani bai tulǵa bolýǵa úirenýińiz kerek. Sizderge oqýda tabandylyq, bilimpazdyq, maqsatqa jetýde jigerlik tileimin. Qurmetti ustazdar, sizderdiń qajyrly eńbekterińiz úshin zor rizashylyǵymdy bildiremin», - dep atap ótti Roman Skliar.
Saltanatty jiynǵa qatysqannan keiin Indýstriia jáne infraqurylymdyq damý ministri oqýshylarǵa arnap «Sanaly urpaq – jarqyn bolashaq» taqyrybynda ashyq sabaq ótkizdi. Onyń barysynda Roman Skliar qazaqstandyq patriotizmge tárbieleý, dostyqqa baýlý, álemdik aýqymdaǵy bizdiń eldiń róli týraly sóz qozǵady.
