Nur-Sultan qalasynyń ákimi Altai Kólginov karantin sharalary jalǵasatynyn aitty, dep habarlaidy "Ult aqparat".
Shahar basshysynyń aitýynsha, memleket ýaqtyly qabyldaǵan qatań shekteý sharalarynyń arqasynda qazir jaǵdaidy baqylaý múmkin bolyp otyr. Alaida indetti juqtyrý qaýpi áli de bar.
«Biz jańa erejelerge sáikes ómir súrýdi úirenýimiz kerek. Búgin azyq-túlik dúkenderi men ózge de taýar satatyn bazarlar, saýda úileri, qonaq úiler, meiramhanalar men saýda oiyn-saýyq ortalyqtary ókilderimen onlain-keńes ótkizdim. Elimizdiń bas sanitar dárigeriniń sheshimine sáikes, azyq-túlik satpaityn bazarlardyń jumysy turǵyndardyń COVID-19 indetine shaldyǵýy 7 kún ishinde 7%-dan aspaǵan jaǵdaida jáne sanitarlyq-epidemiologiialyq talaptar qatań saqtalǵan jaǵdaida ǵana qaita bastalady», - dep jazady Altai Kólginov Instagram paraqshasynda.
Qonaqúi, saýda oiyn-saýyq ortalyqtary men meiramhanalardyń jumysyn qaita bastaýǵa ruqsat berý (qazirgi ýaqytta meiramhanalar onlain tapsyryspen jumys jasap jatyr) epidemiologiialyq jaǵdaiǵa bailanysty kelesi kezeńde qaralady.
«12 mamyrda qoǵamdyq kólik pen halyqqa qyzmet kórsetý ortalyqtarynyń jumysy qaita bastalady» deidi qala ákimi.
