Allergolog-immýnolog, pediatr dáriger, Astana meditsina ýniversitetiniń mikrobiologiia, virýsologiia jáne immýnologiia kafedrasynyń assistenti Móldir Baqtybaeva immýnitetti kóterýdiń birneshe ádisin aityp berdi, dep habarlaidy QazAqparat.
«S vitaminin adam aýyrǵannan bastap ishý kerek. Aldyn ala ishýdiń qajeti joq. Bul dárýmendi adam aýyrǵandaǵy alǵashqy klinikalyq belgiler baiqalǵannan bastap jazylǵanǵa deiin ishedi. Qandai da bir belsendi zatty, mineraldy vitamindi isher kezde aldyn ala tekserip alý kerek. Eger adam tolyq tamaqtanyp, kúndelikti qajetti mikro jáne makro elementter men kaloriiany tutynatyn bolsa, ondai adamdarǵa eshqandai vitaminniń keregi joq. Óitkeni vitaminniń, belsendi zattyń ózi de aǵzada saqtalady. Qandai da bir dárýmendi isher aldynda dárigerden keńes alý qajet», - deidi immýnolog-dáriger «Habar 24» arnasyndaǵy «Diagnoz» baǵdarlamasynda.
Móldir Baqtybaeva sonymen qatar antibiotiktar týraly pikir bildirdi.
Mamannyń aitýynsha, tumaý kezinde antibakterialdy terapiiany qabyldaýǵa bolmaidy. Nege deseńiz, ol immýndyq júieni álsiretedi.
«Virýsty – virýsqa qarsy dárilermen emdeý kerek. Baiqap otyrsaq, virýsqa qarsy dárilerdiń ózi de alǵashqy bir eki kúnde óziniń áserin bere bastaidy. Al endi aýyrmaimyn dep, aldyn ala immýnitetti kúsheitetin, virýsqa qarsy dárilerdi qabyldaýǵa bolmaidy», - deidi ol.
Immýnolog-dáriger dene qyzýy 38,4 deiin bolsa sý iship, dene qyzýyn túsirýge tyrysý kerektigin aitady.
«Árine, eger de nevrologiialyq aýrýlar bolsa, dene qyzýynyń 38,4-ge deiin jetýin kútip otyrmaýymyz kerek. Deneniń ózi qyzýdy jeńe almasa dárigerge júginip, analizden ótý kerek. Sebebi qyzýmen júre berseńiz oǵan qosalqy bakterialdyq infektsiia qosylýy múmkin. Qosymsha infektsiia qosylǵan kezde ǵana biz antibiotik taǵaiyndaimyz», - deidi ol.
Dáriger maman «aýyryp em izdegenshe, aýyrmaýdyń jolyn izde» degen qazaqtyń támsilin eske saldy.
«Eń birinshiden durys tamaqtaný kerek. Iaǵni tolyqqandy vitaminmen, aqýyzben, kómirsýmen baiytylǵan tamaqty tutynǵan abzal. Odan keiin uiqynyń tolyqqandy ári durys bolǵany jón. 8 saǵattyq uiqy bolýy kerek. Úshinshi sportpen shuǵyldanyp, jattyǵý jasaǵan paidaly. Tórtinshiden, bizdiń ózimizdiń denemiz 80 paiyz sýdan turatyndyqtan aǵzany qurǵatpai, kúndelikti keshki altyǵa deiin az mólshermen jyly sý iship júrý kerek», - dedi ol.
