RF Syrtqy ister ministrligine qarasty Máskeý memlekettik halyqaralyq qatynastar institýtynda Qazaqstannyń Reseidegi Tótenshe jáne Ókiletti Elshisi Imanǵali Tasmaǵambetov Reseidiń joǵary oqý oryndarynda bilim alyp jatqan qazaqstandyq stýdenttermen kezdesti, dep habarlaidy "Ult aqparat" elshiliktiń basapsóz qyzmetine silteme jasap.
Kezdesýdiń ashylýynda Elshi Qazaqstan táýelsizdiginiń 25 jyldyǵy aiasynda jetken jetistikteri týraly baiandady. Ol elimizde sheteldik oqý oryndarynda mamandardy daiarlaýǵa úlken kóńil bólinetinin aitty.
Qazaqstandyq diplomat Prezident Nursultan Ábishuly Nazarbaevtyń bastamasymen bir ǵana "Bolashaq" baǵdarlamasy aiasynda 8,5 myńnan asa maman daiarlanǵanyn eske saldy. Elshi Memleket basshysynyń ǵalamdyq bastamalary álemdik arenada halyqaralyq qaýymdastyq tarapynan joǵary baǵalanatynyn jetkizdi.
"Sizder bolashaq diplomat retinde táýelsizdik jyldarynda Qazaqstannyń barlyq memlekettermen áriptestik, dostyq jáne beibitsúigish qarym-qatynastar ornatqanyn bilesizder. Búginde sender ómir boiy bir ǵana mamandyqpen bir jumys atqarady deý qiyn. Oqý jáne qaita oqý – bul jańa ómirdiń talaby, ol ómir boiy jetilýdi qajet etedi", – dedi qazaqstandyq Elshi.
Atap aitqanda, Imanǵali Tasmaǵambetov bilim alý Ekonomikalyq yntymaqtastyq jáne damý uiymy elderinde úshinshi deńgeide ornalasqanyn jáne onyń 42 paiyzdy quraityndyǵyn dálel retinde keltirdi.
Sonymen qatar, Elshi Qazaqstanda jas mamandardyń aldynda turǵan jańa múmkindikter týraly aitty. Onyń paiymdaýynsha, Memleket basshysy jariialaǵan Úshinshi modernizatsiia bilikti mamandardy qajet etedi.
3 saǵattyq kezdesý barysynda Imanǵali Tasmaǵambetov Reseide júrgen jastardyń kókeiinde júrgen san alýyn saýaldaryna jaýap berdi.
"Esterińizde bolsyn, árqaisyńyz elimizdiń bólinbes bir bólshegisiz! Sizderge qarap, ózge el elimizdiń, ultymyzdyń qandai ekenin tanyp biledi. Sizder sapaly bilim alyp, sol bilimderińizdi elimizdiń ósip-órkendeýine qosýlaryńyz qajet. Elimizdiń bolashaǵy sizderge bailanysty. Bilimdi jastar - bolashaq kepili", – dep túiindedi óz sózin elshi myrza.
Aita keteiik, kezdesýge Reseidiń 20 joǵary oqý ornynda bilim alyp jatqan júzden astam stýdent qatysty.
