Máskeý Memlekettik Lingvistikalyq Ýniversitetinde qazaq tili men mádeniet ortalyǵynyń 15 jyldyǵyna orai saltanatty jiyn ótti, dep habarlaidy "Ult aqparat" elshiliktiń baspasóz qyzmetine silteme jasap.
Elbasy Nursultan Ábishuly Nazarbaevtyń tikelei qoldaýymen qurylǵan bul mekeme osy ýaqyt aralyǵynda eki el arasynda ǵana emes, jalpy rýhaniiat salasyndaǵy óziniń úlken orny men rólin dáleldedi. Qazaq tili men mádenieti ortalyǵynyń 15 jyldyq mejeli merekesi eki eldiń yntymaqtastyǵyna eleýli úlesin qosyp otyr.
Jiynǵa kelgender aldynda sóz sóilegen Qazaqstan Respýblikasynyń Resei Federatsiiasyndaǵy Ókiletti jáne Tótenshe elshisi Imanǵali Tasmaǵambetov halyqtar arasyndaǵy mádeni qundylyqtar urpaqtan urpaqqa til arqyly taraitynyn aitty. "Til-eldigimizdi tanytatyn negizgi qural, babalar ósietin jalǵastyratyn qundylyq. Uly jazýshy jáne filosof, Nobel syilyǵynyń laýreaty Alber Kamiý bylai aitqan eken: "Iia, meniń týǵan jerim bar. Ol frantsýz tili", – dep óz sózin sabaqtady elshi myrza.
Sondai-aq ol, IýNESKO uiymynyń málimeti boiynsha, 2030 jyly 20 mln. adamnan kem sóileitin tilder bolashaqta joiylý qaýpi bar ekenin eske salyp ótti. "Iia, tabiǵatta til men mádeniet qana emes, barlyǵy da joiylýy múmkin. Alaida ana tildi saqtaý, árbir adamnyń basty paryzy. Azamattyń ulttyq sanasy – óz tarihyn, mádenietin bailanystyratyn, adamdardy uiystyratyn ózegi", – dedi Imanǵali Tasmaǵambetov.
Osy 15 jyl ishinde qazaq tilin meńgergen 3 býyn túlep ushty. Óz kezeginde, MMLÝ rektory Irina Kraeva, osy ýaqyt aralyǵynda 50-ge jýyq azamat qazaq tilin bilip qana qoimai, kásibi turǵyda halyqaralyq dárejede kelissózder júrgize alatyn maman bolǵanyn maqtanyshpen jetkizdi.
"Qazaq tili kóp mádenietti til úirenýshilerdiń ortalyǵynda tolyqqandy múshesi atandy", – dedi Resei ýniversitet basshysy.
Shara sońynda Qazaqstan elshisi Imanǵali Tasmaǵambetov Ortalyqtyń interaktivti tanystyrylymyn kórip, reseilik stýdenttermen qazaqsha sóilesti.
