Men óz basym Shyǵys Qazaqstan oblysynyń ákimi Danial Ahmetovtyń taiaýda memlekettik qyzmetshilerdiń juma saiyn meshitti jaǵalamai, jumys isteý, eńbek tártibin saqtaý jóninde jasaǵan eskertýin durys dep sanaimyn.
Rasynda Danial Kenjetaiuly aitqandai, biz Ata Zańymyz – Konstitýtsiiaǵa sáikes zaiyrly-demokratiialyq elde ómir súrip jatqan adamdarmyz. Elbasy Nursultan Nazarbaevtyń ózi «Qazaqstan-2050» Strategiiasy: qalyptasqan memlekettiń jańa saiasi baǵyty» atty Joldaýynda bizdiń zaiyrly memleket iesi ekendigimizdi, onyń kelbeti – Qazaqstannyń tabysty damýynyń mańyzdy sharty bolyp tabylatyndyǵyn qadap turyp aitqan bolatyn.
Osy qaǵidatty keibir sheneýnikter bilse de, bilmegensip, ózderinshe jaqsy atanyp, juma namazyna baryp jyǵylyp jatady. Qudaiǵa haq, bás tigeiin, solardyń kóbi Quran-kárimde jazylǵan ýaǵyzdardy bilmeidi de, tipti isi murnyna da barmaidy.
Al osyndai jaǵdaidy úlgi tutyp, betke ustaityn shala saýattylar, dindi ýaǵyzdaýshylar tolyp jatyr. Ondailardy kózimiz de kórip, qulaǵymyz da estip júr.
Birde menimen buryn aýzy araqtan bosamaǵan, sonyń kesirinen qyzmetinen aiyrylǵan, keiinnen meshitten shyqpai, jurt arasynda shariǵatty ýaǵyzdap júrgen azamat biraz daý-damaiǵa baryp qaldy. Onyń aqylgóilengenine den qoisaq, qazaq bitkenniń bári meshitten qalmaýy, juma namazyna jyǵylyp otyrýy kerek eken.
- Jurttyń báriniń bulai isteýi qajet emes shyǵar. Jalpy bul árkimniń óz erkindegi is qoi, - dep qarsy jaýap bersem: - Oi, aǵa, siz de musylman emessiz be, bes paryzdyń biri – namaz oqý ekenin umytpańyz. Áne, sizder siiaqty qyzmet istegender, tipti ákimdiktegilerdiń ózderi juma namazyna qatysyp júr, - dep játte kelip órekpidi.
Mine, joǵaryda aitqanymyzdai, mundai ózderinshe «dinshil» jandar Konstitýtsiia printsipterin qurmetteý mindet ekeniniń, bizdiń zaiyrly qoǵamda ómir súrip jatqanymyzdyń baiybyna da barmaidy.
Árine, dini qarym-qatynas, dinge degen kózqaras – óte kúrdeli de názik másele. Bul árbir adamnyń ar-ojdanynyń isi ári saqtyqpen jáne salmaqtap qaraityn dúnie.
Búgingi tańda jastar da imandylyqqa bet buryp, meshitke kóptep baratyn bolyp júr. Bul bir jaǵynan ońdy kóringenimen, ekinshi jaǵynan olardyń talailarynyń Islam dininiń taza jolynan aýytqyp, teris piǵyldy dini aǵymdar men uiymdarǵa kirip jatqandary da jasyryn emes qoi. Elimizde sońǵy kezderi oryn alǵan ekstremistik áreketter, adam ólimine aparǵan qarýly qaqtyǵystar osynyń aiǵaǵy bolsa kerek.
Menińshe, bizdiń imandylyq bolmysymyz meshitke jol buryp, namaz oqýdan ǵana kórinis tappaidy. Allanyń jolyna adal bolǵysy keletin adamnyń júregi taza, sanasy biik bolyp, halqyna qaltqysyz qyzmet etýi, jemqorlyqqa salynbai, óziniń mindetine jaýapkershilikpen qaraýy tiis. Al bul qasietter birinshi kezekte memlekettik basqarý oryndarynda otyrǵandardyń boiynan kórinis tapsa kerek.
Ókinishke orai, bunyń el taǵdyryn sheshýge múddeli biliktiń tizginin ustap júrgen sheneýnikterdiń talaiynda jetispei jatyr-aý.
Bolat Saǵdauly,
Ult portaly
.jpg)
