Qazaqstandyq didjei Imanbek Spotify servisiniń arnaiy syilyǵyna ie boldy, dep habarlaidy QazAqparat.
Resýrstyń baspasóz qyzmeti taratqan málimetke sensek, Imanbek - TMD boiynsha tregi 1 mlrd-tan asa márte tyńdalǵan tuńǵysh mýzykant. Ol bul mejege ótken jyldyń qazan aiynda jetken.
Onyń Roses-Imanbek Remix atty áýenin tyńdaǵandar sany búginde álem boiynsha 1,5 milliardtan asyp ketti.
Mýzyka servisi didjeidi quttyqtap, syilyqty tabystady.
«Artisti osyndai iri jetistikpen jáne klýbqa qosylýymen quttyqtaimyz. It is for Imanbek!» delingen habarlamada.
Osylaisha Imanbek Billions Club-qa qosyldy. Onyń pleilist boiynsha «kórshileri» - Billi Ailish, Trevis Skott, Adel jáne basqa álemdik ataqty mýzykanttar.
Munyń aldynda Spotify-dyń dál osy marapaty kanadalyq reper Dreik, norveg didjeii Kygo jáne britan ánshisi Dýa Lipaǵa tapsyrylǵan edi.
Aita keteiik, atalǵan remiksimen álemdik mýzyka charttarynda qara úzip alǵa shyqqan Imanbek Zeikenov án árleýdi jergilikti didjeiler men prodiýserlerden jáne Youtube jelisindegi videosabaqtan úirengen.
2019 jyldyń jazynda Imanbek Saint Jhn atty reperdiń Roses atty ánin taýyp, soǵan remiks jazýdy qolǵa alady.
Bul kompozitsiia úsh jyl buryn shyǵyp qoiǵan bolatyn. Imanbek ánge remiks jazyp, ony áleýmettik jelige jariialady. Arada birneshe ai ótkende ol pop juldyzǵa ainaldy.
Ótken jyly qazaqstandyq mýzykanttyń Roses ánine jazylǵan remiksi Grammy syilyǵyn jeńip aldy.
