Almaty qalasy ortalyq meshitiniń bas imamy Erkinbek Shoqai Ramazan aiynda oraza ustaýǵa múmkindigi joq azamattarǵa keńes berdi, dep jazady Sputnik Qazaqstan.
"Ramazan aiynda oraza ustai almaityn kisiler bolady. Emizýli balasy bar nemese júkti áielder, densaýlyǵy kótermeitin kisiler bar. Saparǵa shyǵatyn kisilerge de shariǵattyń jeńildigi bar. Olarǵa osy Ramazan aiynda orazalaryn ashýyna ruqsat, keiin densaýlyqtary ornyna kelgennen keiin, sapardan oralǵannan keiin orazalarynyń qazasyn ustaidy", - dedi imam.
Sonymen qatar oraza ustaýǵa múmkindigi joq adamdarǵa arnalǵan fidiia sadaqasynyń kólemi 1 700 teńge bolyp bekitilgenin habarlady.
"Bolashaqta múlde oraza ustaýǵa múmkindigi joq azamattar da bar. Sozylmaly aýrýǵa shaldyqqan, úlken jastaǵy qariialarǵa orazany ustamaýǵa ruqsat, biraq olar árbir kúnniń orazasy úshin fidiia sadaqasyn tóleýge mindetteledi. Fidiia sadaqasy degen - bir kúndik miskinniń tamaǵy. Eldegi ashanalardaǵy taǵam baǵasyn zerttei kele, QMDB men onyń janyndaǵy ǵulamalar keńesiniń sheshimimen fidiianyń kólemi 1 700 teńge bolyp bekitildi. Iaǵni jaǵdaiy tómen bir adamnyń eki mezgil toia ishetin tamaǵy. Bul - eń tómengi baǵa", - dedi ol.
Sonymen qatar imam buǵan deiin qalada jyl saiyn meshit janynda aýyzashar beretin kásipkerlerge tótenshe jaǵdai kezinde qalai kómek kórsetýge bolatynyn aitty.
"Qaiyrymdy jandardyń kómegimen jyl saiyn meshit janynda dastarqan jaiylatyn. Biyl bulai bolmaidy. Karantin rejimin buzýǵa bolmaidy, sondyqtan zatty úige jetkizip beretin qyzmetti qoldaný arqyly jaǵdaiy tómen, kópbalaly otbasylarǵa aýyzashar taǵamyn jetkizýdi josparlap otyrmyz", - dedi ortalyq meshittiń bas imamy.
