Qurban shalyp jatqanyn nemese shalynǵan maldyń basyn ustap sýretke túsý – bul shariǵatqa qaishy amal. Bul jóninde aldaǵy Qurban ait merekesine qatysty ótken baspasóz máslihatynda «Nur Astana» meshitiniń bas imamy, Astana qalasynyń ókil imamy Asqar Muqanov málimdedi, dep habarlaidy Baq.kz tilshisi.
«Iisi musylman balasyn baýyrmaldyqqa, tatýlyqqa, meiirimdilik pen qamqorlyqqa shaqyratyn Qurban ait meiramy biyl 21 tamyzǵa dóp kelip otyr. Astana qalasy boiynsha Qurban ait namazy tańǵy saǵat 07:00-de bastalady dep sheshildi. Sebebi, shariǵat boiynsha kún naiza boiy kóterilgennen keiin árbir aqyl-esi durys, baliǵat jasyna tolǵan, saparda emes musylman balasyna ait namazyn oqý mindet amaldardan bolyp esepteledi. Sáikesinshe, 20 tamyz – Arapa kúni», - degen imam namaz aitylǵan ýaqytta bastalyp ketetindikten, astanalyqtardy namazǵa erterek qamdanyp kelýge shaqyrdy.
Imam Astana qalasy ákimdiginiń qoldaýymen ulyq meiramdy buqaralaq sipatta merekeleý úshin birqatar mádeni, rýhani jáne qaiyrymdylyq is-sharalar baǵdarlamalary qolǵa alynǵanyn aitty.
«Qaiyrymdylyq shara degenimiz - sol kúngi, iaǵni Qurban ait kúndegi qaiyrymdy jandardan túsken etti buzyp almastan, birden Astana qalasynyń jaǵdaiy tómen kópbalaly nemese múgedek músheni qamtyǵan otbasyǵa tizim boiynsha, kezek boiynsha taratylady. Mádeni sharalar degenimiz - ait namazynan keiin meshitterdiń aldynda qaiyrymdylyq jármeńkeler, sporttyq sharalar ótýi, aqsaqaldar men meshit jamaǵatyna arnaiy jaiylǵan ait dastarhany», - dedi Asqar Ábitaiuly.
Sonymen qatar, meshit qyzmetkeri málim etkendei, ait kúnderi qaladaǵy «Nur Astana», «Áziret Sultan» jáne «S.Ǵylmani» meshitteriniń aýlalaryna kiiz úiler tigilip, sporttyq-mádeni sharalar ótkiziledi.
«Bul mereke kúnderi árbir shamasy jetken musylman balasy qurban shalyp, Alla aldyndaǵy mindetterin óteitin bolady. Osy tusta bir eskeretin jaǵdai, qazir «selfi» degen nárse shyǵyp ketti. Bul nárse shariǵatqa kishkene qaishy. Qurban shalyp jatqanyn nemese shalynǵan maldyń basyn ustap sýretke túsý – bul shariǵatqa qaishy amal, mundai ádepterge musylman balasy barmaýy kerek. Jylda bizdiń qurban shalýshy jastarymyz soiylyp jatqan maldyń janyna baryp, qan aǵyp jatqanyn sýretke túsirip, áleýmettik jelilerge salyp, ádepsizdik tanytady. Bul - durys emes. Sebebi, qurban shalý – bul Allaǵa jaqyndaý. Pende qurban shalǵanyn bárine jariialap, jar salyp, sýretke túsý, bul amalyńyzdy áshkerelep qoiǵanmen birdei bolady», - dedi imam.
