Qazaqstandyq aýyr atlet Ilia Ilin úlken sportqa qaita oralýyna qatysty pikir bildirdi, dep jazady Sports.kz.
«Minsiz fizikalyq formaǵa shamamen 40% jaqynmyn. Óitkeni aýyr atletikamen men on kún buryn ǵana ainalysa bastadym. Biraq buǵan deiin júgirip, sýǵa shomylyp, fýtbol oinap jalpy sporttyq daiyndyqty nazardan tys qaldyrmadym. 32 jasqa deiin aýyr altetikamen ainalysqym kelgendigi týraly burynan josparym bolǵan», - dedi Ilia Ilin Kazakh TV Youtube-arnasyna bergen suhbatynda.
Sportshy Tokiia Olimpiadasynda top jarý baiaǵydan bergi armany ekendigin aitty.
«Árine, men tórt dúrkin Olimpiada chempiony bolýdy armandaimyn. Birinshiden, men qazir on jyl buryn josparlaǵan josparmen júrip kelemin. Ekinshiden, men bul sportty jaqsy kóremin. Óz isimdi sapaly ári ádemi kórsete alamyn.Onyń ústine men áli jaspyn. 29 jas - bul sportshynyń «shyńy». Sebebi mende aqylmen saralaý, sheberlik pen tájiribe, jalpy daiyndyq jetkilikti», - dedi sportshy óziniń suhbatynda.
Eske sala ketsek, Ilia Ilinniń synamasynan doping tabylyp, 2008 jáne 2012 jyldary ótken Olimpiada oiyndarynyń altyn júldelerinen aiyrylǵan edi. IWF habarlaýyna qaraǵanda, Qazaqstandyq sportshyny diskvalifikatsiialaý merzimi 2018 jyldyń 19 qazanynda aiaqtalady.
Buǵan deiin sporttan shettetý merzimi 2016 jyldyń 10 maýsymynda bastalǵandyǵy týraly habarlaǵan bolatynbyz.
