Aýyr atletikadan tórt dúrkin álem chempiony Ilia Ilinniń sporttyq formasy aýktsionda satylady, dep habarlaidy Sputnik Qazaqstan tilshisi.
Aýyr atlettiń sporttyq formasy aýtizmmen aýyratyn balalardy qoldaýǵa arnalǵan XI qysqy qaiyrymdylyq maskarad keshiniń aýktsionynda satylady. Qaiyrymdylyq balyn jyl saiyn "Bolashaq" korporativtik qory uiymdastyrady.
"Menen qorǵa ne bere alasyń dep surady. Ary oilap, beri oilap, múmkin medaldarymdy syiǵa tartsam ba eken dedim. Bala kezde jeńip alǵan marapattarym óte kóp. Biraq bul tym qarabaiyr bolyp kórindi. Sondyqtan sporttyq formamdy beremin dep sheshtim", — deidi Ilin Sputnik Qazaqstan mýltimediialyq ortalyǵynda ótken baspasóz máslihatynda.
Aitýynsha, bul onyń bylaisha aitqanda "jaýyngerlik formasy". 2015 jyly Groznyida ótken chempionatta kigen eken.
"Sporttyq formalarym arnaiy tigiledi, eshbir jerde joq. Men úshin ár chempionat jeke bir tarih. Osyndai formanyń mende úsheýi bar. Biri prezident Nursultan Nazarbaevtyń mýzeiinde. Kezinde London Olimpiadasyn jeńgen kezde, óz qolymen syiǵa tartqan edim. Ekinshisi Almatyda ótken álem chempionatynda kigen formam. Biraq onyń qaida ekenin, shynymdy aitsam, bilmeimin", — dep kúldi aýyr atlet.
Ilinniń qaiyrymdylyq aýktsionyna bergen formasynda sportshynyń aty-jóni, qoltańbasy bar.
Uiymdastyrýshylardyń aitýynsha, aýktsionda satylatyn sporttyq formanyń bastapqy baǵasy ázirge belgisiz.
"Qaiyrymdylyq sharalaryna qatysýdan eshqashan bas tartqan emespin. Kerisinshe, unaidy, muny árdaiym aityp júremin. Qazaqstan azamaty retinde bir-birimizge qoldan kelgenshe kómektesýimiz kerek dep sanaimyn. Maǵan ideia unady, qýana-qýana kelistim", — deidi ol.
