Ile-Alataýy ulttyq parkinde ornalasqan Aiýsai taý shatqalynda Almaty qalasynyń ekologiialyq qoǵamdastyq ókilderi Sivers alma aǵashynyń 100 kóshetin otyrǵyzdy. Ony ǵalymdar jer betindegi barlyq alma aǵashynyń ata tegi dep ataidy.
Bul týraly QR Ekologiia, geologiia jáne tabiǵis resrýstar ministrliginiń resmi saitynda habarlandy.
Kóshetterdi otyrǵyzý aktsiiasy Ulttyq parkterdi qoldaý qoǵamdyq qorynyń jetekshisi Sergei Spitsynnyń bastamasymen uiymdastyryldy. Ol buǵan deiin Ile-Alataý ulttyq parkiniń túrli shatqaldarynda birqatar jaiaý júrginshiler joly, jaiaý júrginshiler kópiri jáne týristik infraqurylym nysandaryn memlekettiń qarajatynsyz ornatqan bolatyn.
Aktsiiaǵa ekologiialyq qoǵamdastyqtyń ókilderi qatysty. Olardyń ishinde «Tabiǵat» Qazaqstan qaýymdastyqtary men kásiporyndarynyń ekologiialyq odaǵynyń basshysy Mels Eleýsizov, «Qazekologiia» respýblikalyq ǵylymi-óndiristik jáne aqparattyq ortalyǵynyń jetekshisi Amangeldi Yskaqov sekildi bedeldi ekologtar, sonymen qatar tabiǵatqa bei-jai qaramaityn basqa da el azamattary bar.
Sivers alma aǵashy Ile Alataýynda, Qazaqstannyń ońtústiginde jáne shyǵysynda birneshe myń jyldan beri ósedi, Qyzyl kitapqa engen.
Ekologtardyń pikirinshe, ony sirek kezdesetin túr retinde, elimizdiń simvoly retinde saqtaý, odan ári jandandyrý jáne qorǵaý úshin kóp jumys atqarý qajet.
- Búginde kópshiligimiz ulttyq parkke barýdy káýap jeitin jer dep túsinetinimizdi moiyndaýymyz qajet. Mundai demalystan keiin únemi taý bop úiilgen qoqys pen kesilgen aǵashtar ǵana qalatynyna bárimiz kýámiz. Al ulttyq parkke barýdyń sheteldik tájiribesi múlde basqa. Bul degenimiz eń áýeli janýarlar men ósimdikterdiń tirshiligi týraly tanyp-bilý, sondai-aq jaýapty ekologiialyq týrizm», - dedi Mels Eleýsizov.
Osy rette, aktsiia barysynda atap ótilgendei, jaqyn ýaqytta Ile-Alataýy ulttyq parkine kelýshilermen tárbie jumysy uiymdastyrylmaq. Jaqynda Aiýsai shatqalynda zamanaýi jáne ekologiialyq taza saparlaý ortalyǵy paida bolyp, onda kelýshilerge ulttyq saiabaqta qandai ósimdik ósetini, qandai janýarlar mekendeitini týraly aqparat berý jumysy bastalady. Balalarǵa arnalǵan qyzyqty sabaqtar men eresekterge ekskýrsiialar uiymdastyrylady.
Sondai-aq, burynnan bar jaqsy dástúrlerdi qaita jańartý, sonyń ishinde ainalma serýendeý jolyn jasaý josparlanýda. Bul jerde kelýshilerge marshrýttyń uzyndyǵy men kúrdeliligi, navigatsiiasy, demalý jáne kórý alańdary týraly barlyq qajetti aqparat usynylady. Sonymen qatar, barlyq jol tegin bolady. Saparlaý ortalyǵyna barý úshin qosymsha aqy alynbaidy.
- Bizdiń aktsiiamyzdyń ideiasy – jaqyn ýaqytta Ulttyq saiabaqtyń saparlaý ortalyǵynyń janynan shatqalda Sivers alma aǵashy baǵyn ósirý. Kelýshiler osy jerde demalyp, saiabaq florasymen tanysa alar edi. Al mektep oqýshylaryna ekologiialyq bilim berý sabaǵyn ótkizýge bolady, - deidi Sergei Spitsyn.
Ile-Alataýy ulttyq parkiniń pitomnigine otyrǵyzý úshin kóshetter satyp alyndy. Mundaǵy oi – sirek kezdesetin endemikalyq ósimdikterdi ósirý jáne qalpyna keltirý.
Aktsiia ál-Farabi atyndaǵy Ulttyq ýniversitettiń qoldaýymen ótkizildi.
