Almatyda Ile-Alataý memlekettik ulttyq tabiǵi parki Qoǵamdyq keńesiniń kezekti otyrysynda park aýmaǵynda ekotýrizmdi damytý máseleleri talqylandy. Máselen, balalarǵa arnalǵan taý shańǵysy sportyn damytý bazasyn daiyndaý týraly usynys aityldy, dep habarlaidy "Ult aqparat".
QR Ekologiia, geologiia jáne tabiǵi resýrstar ministrliginiń baspasóz qyzmetinen málim etkendei, 2021 jyly aqpan aiynda Ile-Alataý ulttyq parkinde ekologiialyq týrizm infraqurylymyn damytýdyń bas josparyn qaraý boiynsha qoǵamdyq tyńdaý ótti. Qoǵamdyq tyńdaý hattamasy Ile-Alataý ulttyq parki men Almaty qalasy jáne Almaty oblysy Týrizm basqarmalarynyń saittarynda jariialandy. Ulttyq parkterde týristik jáne rekreatsiialyq qyzmetti júzege asyrý erejesine sáikes tenderlik jáne konkýrstyq qujattar jobasy da ulttyq parktiń internet-resýrsyna salyndy.
«Qazirgi ýaqytta Ulttyq park ekologiialyq týrizm qyzmetine jerlerdi uzaqmerzimdi paidalanýǵa beriletin ýchaskeler sany 9-dan 8-ge, iaǵni 171 gektarǵa, qysqarmerzimdi paidalanýǵa usynylatyn jerler 26-dan 11-ge, 7,9 gektarǵa azaidy. Uzaqmerzimdi jobalarǵa qoiylatyn negizgi talap - keshendi qurylys júrgizbei, qaita alynatyn qadalar qaǵý nemese geoburandalar tehnologiiasyn qoldaný jáne jerdiń qunarly topyraǵyna ziian keltirmeý. Sonymen qatar qaldyqtardy basqarý, tazalaý qurylǵylaryn qoldaný múmkindikterin qarastyrý kerek», - dedi Ile-Alataý MUTP direktory Damir Malgeldiev.
Atap óteiik, qoǵam ókilderiniń pikirin eskere kele ulttyq park jerlerin uzaqmerzimdi paidalanýǵa berý 49 jyldan 25 jylǵa, qysqamerzimdi paidalanýǵa berý 5 jyldan 1 jylǵa qysqardy. Qorshaǵan ortaǵa zalal keltirmeý talaptary saqtalmasa, Ulttyq park kelisimshartty birjaqty negizde buza alady.
Jiynda Almaty qalasy Týrizm basqarmasynyń basshysy Sabina Amangeldi «TsSKA» taý shańǵy bazasyn rekonstrýktsiialaý jobasyn tanystyrdy. Keńes músheleri atalǵan nysan ásirese, balalarǵa yńǵaily belsendi demalys aimaǵy retinde damýy tiis ekendigin atap ótti. Aldaǵy ýaqytta atalǵan jerde balalar taý shańǵysy bazasyn jasaý máselesi men basqa da jobalar taǵy da keńes talqysyna salynady.
Jiyn qorytyndysy boiynsha keńes músheleri ekotýrizm jobasyn júzege asyrý josparlanǵan ýchaskelerde kóshpeli jinalys uiymdastyrý týraly sheshimge keldi.
Atap óteiik, erekshe qorǵalatyn tabiǵi aýmaqtarda ekologiialyq týrizmdi damytý azamattardyń boiynda tabiǵatqa janashyrlyqty qalyptastyrýǵa septigin tigizetin ekologiialyq aǵartý jumysyn júrgizýge jáne jergilikti halyqty qyzmet kórsetý salasynda jumyspen qamtýǵa múmkindik beredi.
Tender men konkýrsqa qatysty aqparat, qabyldanǵan sheshimder jaiynda aqparat Alataý ulttyq parkiniń saitynda jariialanady.
