Ishki ister ministrligi Esirtki qylmysyna qarsy is-qimyl departamentiniń basqarma bastyǵy Baqytjan Ámirhanov Qazaqstanda esirtki saýdasynyń damýyna yqpal etip otyrǵan faktorlardy atady, dep habarlaidy QazAqparat.
«Biyl quqyq qorǵaý organynyń qyzmetkerleri esirtkimen bailanysty zań buzýdyń 3,5 myń faktisin anyqtady. Onyń myńnan astamy – esirtkimen bailanysty qylmystar. 750 esirtki satý, 200 asa iri kólemde esirtki saqtaý faktisi tirkeldi. Shamamen 2 tonna (1,9) túrli esirtki ónimi tárkilendi. Onyń 4 kelige jýyǵy geroin, 41 kelisi sintetikalyq eskitki bolǵan», - dedi basqarma basshysy.
Onyń sózine qaraǵanda, jyl basynan beri esirtki saýdasyna qatysy bar 6 uiymdasqan qylmystyq top áshkerelenip, serkeleriniń ústinen 12 qylmystyq is qozǵalǵan. Toptardyń 3 basshysy, 30 múshesi qylmystyq iske tartylyp, kontarbandanyń 50 faktisi anyqtalǵan.
«Qazaqstandaǵy esirtki saýdasynyń damý úrdisi mynadai jaittardan qalyptasyp otyr. Birinshiden, Jambyl oblysyndaǵy Shý jazyǵynda kannabistiń shikizat bazasy bar. Sondai-aq, Qyzylorda oblysynda sora ósirý tyiylmai otyr.
Aýǵanstannan keletin geroinniń «soltústik marshrýt» boiynsha ótetin trafigi ortalyq Qazaqstan aýmaǵy arqyly Resei men Eýropaǵa baǵyttalady. Irgeles elderden sintetikalyq esirtkiniń kontrabandasy keledi. Qazaqstannyń óz ishinde de sintetikalyq esirtki óndirisin zerthanalyq jaǵdaida jolǵa qoiý talpysy azaimai tur», - dedi departament ókili.
