Qazaqstan kez kelgen mólsherdegi marihýannany zańdastyrýdy qarastyryp jatqan joq. Bul týraly QR IIM Esirtki qylmysyna qarsy is-qimyl departamentiniń bastyǵy Tilegen Matkenov aitty, dep habarlaidy QazAqparat tilshisi.
«Qazirgi tańda Qazaqstan kez kelgen mólsherdegi marihýannany zańdastyrýdy oilap otyrǵan joq. Bizdiń Shý ańǵarynda ósetin jabaiy marihýannanyń kanabistik quramy – 5 paiyz ǵana. Niderlandyda máselen, kanabistik quram 15-17 paiyzǵa deiin bolady», - dedi ol vedomstvoda ótken baspasóz máslihatynda.
Departament bastyǵynyń aitýynsha, kez kelgen nashaqor kezinde esirtkiniń jeńil túrinen bastaǵan.
«Marihýanany zańdastyra bastaǵan memleketterdiń bári basqa problemamen betpe-bet kelýde, endi olarda geroinniń ornyn metadon (qanǵa ine arqyly engizilmei, jutyla salatyn sintetikalyq esirtki) basyp bara jatyr. Iaǵni, belgili bir esirtkini qabyldap júrgen nashaqorlar esirtkiniń aýyr túrin, iaǵni geroindi izdep, kóshege shyǵyp ketken. Esirtkiniń aýyr túrinen bastap ketken birde-bir nashaqor joq. Bári de jeńil túrin tatyp kórýden bastalady», - dedi ol.
Eske sala ketsek, buǵan deiin Tilegen Matkenov esirtkimen ainalysqan 5 qylmystyq toptyń áreketine shekteý qoiylǵanyn aitqan edi.
