Foto: ashyq derekkóz
Qys bastalysymen aýa raiynyń qubylýy men jol jaǵdaiynyń nasharlaýy apat qaýpin arttyrady. Osyǵan bailanysty Ishki ister ministrligi jol júrisine qatysýshylarǵa arnaiy úndeý jasap, saqtyq sharalaryn qatań saqtaýǵa shaqyrdy, dep habarlaidy Polisia.kz.
IIM málimetinshe, júrgizýshiler men jaiaý júrginshilerdiń ómiri men densaýlyǵyn qorǵaý maqsatynda jol qozǵalysyna ýaqytsha shekteýler engiziledi.
"Qajet bolǵan jaǵdaida joldar tolyqtai jabylýy múmkin. Qys mezgilinde avtojoldarǵa 3.24 «Jyldamdyqty shekteý» belgileri ornatylady. Al Astana – Shýchinsk jáne Astana – Temirtaý baǵyttarynda aýa raiy nasharlaǵanda jyldamdyqty avtomatty túrde tómendetýge múmkindik beretin elektrondy tablolar qoiylǵan", – dedi IIM Ákimshilik politsiia komitetiniń erekshe tapsyrmalar jónindegi inspektory Aqtoty Boranova.
Onyń aitýynsha, bul elektrondy aqparattyq tablolar boran, kóktaiǵaq siiaqty qolaisyz meteojaǵdailar kezinde ýaqytsha shekteýler engizý úshin qoldanylady. Barlyq belgiler standarttarǵa sáikes ornatylǵan jáne jalpy tártiptegi jol belgileri siiaqty mindetti túrde saqtalýy tiis.
Sonymen qatar, jyldamdyqty tirkeitin kameralar jańa shekteýlerge avtomatty túrde aýysyp, kólik quraldarynyń ruqsat etilgen jáne ortasha jyldamdyǵyn baqylaýdy jalǵastyrady.
IIM azamattardy aýa raiy boljamyn qadaǵalap, jolǵa shyqpas buryn avtokóliktiń tehnikalyq jaǵdaiyn tekserýge, al jolda belgilengen erejelerdi qatań saqtaýǵa shaqyrdy.
