Ishki ister ministri Erlan Turǵymbaevtyń tapsyrmasy boiynsha búginde atyraýlyq politsiia serjanty Shalqar Aqymǵalievti este qaldyrý sharalary politsiianyń barlyq bólinisterinde jan-jaqty júrgizilýde, dep habarlaidy IIM baspasóz qyzmeti.
Ol qyzmettik boryshyn óteý kezinde sýǵa batyp bara jatqan qyzdy qutqaram dep qaza tapqan edi.
Óńirlik politsiia departamentterinde patriottyq tárbie saǵattary ótkizilýde, sonyń aiasynda batyr týraly beinerolikter túsirý jumystary uiymdastyrylyp, qyzmetkerler Shalqar Aqymǵalievke jyr joldary men mýzykalyq shyǵarmalaryn arnady.
Sh. Aqymǵalievtiń otbasyna materialdyq kómek kórsetýdi ministr basty nazarda ustap otyr. Soǵan sáikes, qapiiada kóz jumǵan politsiia serjantynyń otbasy Ishki ister organdary qyzmetkerlerin áleýmettik qoldaý qorynyń qamqorlyǵyna alyndy.
Sonymen qatar, IIM ortalyq apparaty men óńirlik Politsiia departamentteri, qylmystyq-atqarý júiesi, qutqarý qyzmeti jáne Ulttyq ulan jaýyngerleri Shalqardyń otbasyna materialdyq qoldaý kórsetýde.
Ishki ister ministri jáne IIM óńirlik bólinisteriniń basshylary qaza bolǵan qyzmetkerdiń otbasyna kóńil aitý jedel hatyn joldady. Arnaiy ashylǵan esep-shotqa qyzmetkerler erikti túrde búginge deiin 29 million teńgeden astam qarjy aýdardy.
Erlikpen kóz jumǵan qyzmetkerlerdiń otbasyna ózge de kómekter aldaǵy ýaqytta da turaqty jasalatyn bolady, - dep atap ótti ishki ister ministri Erlan Turǵymbaev.
Eske sala keteiik, biylǵy jylǵy 21 naýryzda Atyraý qalasynda patrýldik ekipaj quramynda júrgen politsiia serjanty Shalqar Aqymǵaliev kópirden Jaiyq ózenine sekirgen qyz jaily habarlama alǵan boida oilanbastan muzdy sýǵa qoiyp ketti. Sóitip qyzdyń ómirin ajaldan arashalap qalǵan edi. Alaida, ózi qatty aǵynnyń ishinde arpalysyp júrip, kóz jumdy.
Shalqar Aǵymǵaliev 1994 jyly 1 sáýirde dúniege kelgen. Atyraý oblysy Inder aýdanynyń týmasy. Ol kóp balaly otbasynyń jalǵyz asyraýshysy edi. Otbasyn quryp úlgermegen. Politsiia qatarynda qyzmet atqaryp júrgenine 5 jyldan asqan.
Jalpy, Táýelsizdik alǵan jyldardan beri 2264 politsiia qyzmetkeri qaza tapsa, sonyń 785-i qyzmettik boryshyn óteý kezinde, 73-i qaýipti qylmyskerdi ustaý operatsiiasy barysynda erlikpen jan qidy. Sondai-aq 2419 politsiia qyzmetkeri jaraqattanǵan. Sonyń ishinde 899-y qylmyskerdi ustaý barysynda jaralandy.
El-jurty, ishki ister organdary erjúrek batyrlaryn árdaiym qurmet tutady, rýhyna taǵzym etedi. Olardyń erlik isteri eshqashan umytylmady.
