Qazaqstandyq ánshi Dimash Qudaibergen Máskeýdegi Kreml sahnasynda án salyp, «NTV» arnasynyń «Ortalyq televidenie» baǵdarlamasynda qonaqta boldy, dep habarlaidy "Ult aqparat".
Reseige barǵany týraly ánshi Instagram paraqshasynda jazdy. «NTV» arnasyndaǵy «Ortalyq televidenie» baǵdarlamasynda maestro Igor Krýtoimen birge alǵashqy dýettiń tusaýkeseri ótti», - dedi D.Qudaibergen.
Biregei tembrimen álem halqyn tamsandyrǵan Dimashty osylaisha, taǵy bir reseilik arna moiyndap otyr. Shoýdy ázirlegender ánshiniń daýysynyń qupiiasyn ashpaq bolady. Resei shoý-biznesiniń naryǵyna batyl qadammen engen ánshi baǵdarlama sońynda kompozitor Igor Krýtoidyń súiemeldeýimen «Liýbov ýstavshih lebedei» ánin oryndap, kópshiliktiń qoshemetine bólendi.
«Osy ánnen keiin sen sóilei alasyń ba?», - dep surady tańdanysyn jasyra almaǵan baǵdarlama júrgizýshisi Dimashtan.
Óz kezeginde kompozitor Igor Krýtoi Dimashtyń «Resei pýblikasyn baýrap alatynyn» aityp ótti.
Keiin Dimash atalmysh ándi Máskeýdegi Kreml saraiynda Resei Federatsiiasynyń Ishki ister organdarynyń qyzmetkerleri kúnine arnalǵan kontsertte shyrqady.
Aita keterligi, «Liýbov ýstavshih lebedei» ánin kompozitor Igor Krýtoi men aqyn Mihail Gýtseriev áigili frantsýz ánshisi Lara Fabian úshin jazǵan bolatyn.
Sonymen qatar, Dimashtyń oryndaýyndaǵy «Screaming» ánine túsirilgen beinebaian reseilik «MÝZ-TV» arnasynda kórermenderdiń eń kóp daýysyna ie bolyp, «mýzraskrýtka» baǵdarlamasynda kósh bastaǵan edi.
Budan buryn, qyrkúiek aiynda qazaq ánshisi Reseide "Jańa tolqyn" baiqaýynda jáne "A-Stýdio" tobynyń 30 jyldyq mereitoiyna arnalǵan kontsertte qonaq retinde óner kórsetken-tin.
Al, 19 qarashada QR Mádeniet jáne sport ministrligi men Qazaqstannyń Ulybritaniiadaǵy elshiliginiń qoldaýymen Londonda Dimash Qudaibergenniń kontserti ótedi. Kontsert biletteriniń bir kúnde satylyp ketkeni de belgili.
Eske sala keteiik, Dimash Qudaibergen Qytaidaǵy "I am a singer" baiqaýyna qatysqannan keiin álemde keńinen tanymal boldy. Qazaq balasynyń talanty álemdik juldyzdardy, onyń ishinde Djeki Chan, Lara Fabian, Al Bano jáne taǵy basqalardy tamsandyrdy.
