Keiinirek SportRadar.kz Telegram-arnasy oqiǵanyń mán-jaiyn anyqtapty.
Derekkóz "Kaspii" MFK direktory Erjan Jańbyrovpen habarlasyp, mynadai pikirin alǵan:
"Birden aitaiyn: jankúierlerdiń esh qatysy joq. Jappai tóbeles shyǵarǵandardyń biri - bizdiń klýbtyń qyzmetkeri, ol birinshi jumys kúni-aq jumystan shyǵarylady.
Biraq men mynaǵan nazar aýdartqym keledi. Oiyn basynda bizdiń ákimshige match tóreshileriniń biri Aslan Galaev kelgen. Ol belgili bir syiaqyǵa sapaly tórelik jasaimyn dep ashyq aitqan. Netken betsizdik! Mundai oiyn oinamaimyz, biraq úndemei de otyra almaimyz! Dál osy arbitrler oiyndy búldirdi dep oilaimyn, sondyqtan janjal shyqty.
Taǵy bir másele. Biz nege búgin baqylaý tártip komissiiasynyń sheshiminsiz "Atyraýmen" qaitalap kórermensiz oiyn ótkizdik?" - dedi Jańbyrov.
Derekkóz málimetinshe, federatsiia ókilderi aldaǵy ýaqytta resmi jaýap beriletinin habarlaǵan.
"Biz pikirin suraý úshin arbitr Aslan Galaevpen de bailanysqa shyqtyq. Biraq arbitr pikir bildirýden bas tartty", - dep jazǵan derekkóz.
Derekkóz málimetinshe, oiynshylar ǵana emes, "Kaspii" ákimshisi Nurjan Sultaǵaziev te, sondai-aq, "Atyraý" bapkeri Jaqsylyq Baisariev te eskertý alǵan.
Osy daýly matchtan keiin "Qairat" qaqpashysy Igita málimdeme jasady.
"Men osy eldi árdaiym qorǵaimyn. Áldene alańdatsa, eshqashan únsiz qalmaimyn... Bizdiń qazaqstandyq fýtzal jyl ótken saiyn damýy úshin kúresip keldim, kúresti jalǵastyra da beremin, fýtzalymyzdyń deńgeii qazir osyndai jaǵdaiǵa kóterilgenine men baqyttymyn. Biz salǵan joldy buzýǵa eshkimge de múmkindik bermeimin. Qazaqstandyq fýtzal óte úlken, ózgeler oilaǵannan da úlken! ALǴA, QAZAQSTAN, biz árqashan birge bolamyz!!! Bul eldi jaqsy kóremin!" - dep jazdy Igita.
