Elordada ákeri jiynǵa shaqyrylǵan 160-tan astam adam dárigerlik tekserýden ótti, dep habarlaidy QazAqparat.
2 sáýir kúni Memleket basshysy Qasym-Jomart Toqaev áskeri mindettilerdi arnaýly jiynǵa shaqyrý týraly Jarlyq shyǵarǵan edi.
«Prezident Jarlyǵynan keiin elimizdegi barlyq Qorǵanys isteri jónindegi departamentter qyzý iske kirisip ketti. Jergilikti atqarýshy organdar ákimdiktermen birlesip, barlyq aimaqtardyń aýmaqtyq qorǵanys brigadalary quramynda tirkelgen áskeri mindettilerdi dárigerlik komissiiaǵa shaqyryp, saraptaý jumysyn júrgizip jatyrmyz. Nur-Sultan qalasy boiynsha 100 áskeri mindettini sapqa alý josparlanyp otyr. Munda óz erkimen kelip jatqan zapastaǵy ofitserler men serjanttar kóp», - dedi Nur-Sultan qalasy Qorǵanys isteri departamenti baspasóz qyzmetiniń basshysy Ǵani Artyqov tilshilerge bergen suhbatynda.
Onyń aitýynsha, búgin elordada 50 adamdy dárigerlik tekserýden ótkizý josparlanǵan, is júzinde 160 adam tekserýden ótken.
Áskeri mindetin óteýge kelgen eriktiler arasynda tanymal ánshi, boksshy, zapastaǵy leitenant Ibragim Eskendir de bar.
«Bizdiń batyr babalarymyz el basyna kún týǵanda el qorǵap shyqqan edi. Beibit zamanda da jyraýlarymyz top bastap, eldi yntymaqqa shaqyryp otyrǵan. Elimizde tótenshe jaǵdai oryn alǵan soń, qazaqtyń bir balasy retinde elime qosqan úlesim bolsyn, sportta da, ónerde de qoldaýyn aiamaǵan halqymyzǵa paida bolsyn degen nietpen qyzmet etýge kelip otyrmyn. Ózim Eýraziia Ulttyq ýniversitetinde áskeri kafedrany támamdadym, zapastaǵy leitenantpyn. Dezinfektsiialyq jumys bola ma, blokpostqa jibere me, eńbekten qashpaimyz. Ónerdegi, sporttaǵy zamandas baýyrlarymdy jumylyp qyzmet etýge shaqyramyn», - dedi Ibragim Eskendir.
Taǵy bir áskeri erikti, qol kúresten halyqaralyq dárejedegi sport sheberi Timýr Sypataev tótenshe jaǵdaida áleýmettik jelide onlain-jattyǵýlar uiymdastyryp júrgenin aitty.
«Prezident Jarlyǵy shyqqan soń, 18-den asqan árbir er jigit elge, ultqa qyzmet etýi mindetti. Qazir elimizde jáne tórtkúl dúniede bolyp jatqan qiyn-qystaý zamanda nege halyqqa qyzmet etpeske? Men ózim Nur-Sultan qalasynyń Qorǵanys isteri departamentine keldim. «Tártipke baǵynǵan qul bolmaidy» dep, halyqqa kómek berýge ár kezde daiynmyn», - dedi T. Sypataev.
Qorǵanys isteri departamentiniń habarlaýynsha, jiynǵa shaqyrylǵan azamattar 3 ai merzimge deiin qaladaǵy aýmaqtyq qorǵanys brigadasy quramynda jumys isteidi.
«Olardyń barlyǵy - buryn áskeri daiyndyqtan ótken, iaǵni, áskeri kafedra bitirgen, merzimdi áskeri qyzmet atqarǵan nemese áskeri-tehnikalyq mektepterde kýrstan ótkender. Osy azamattarǵa QR Áskeri qyzmeti jáne áskeri qyzmetshilerdiń mártebesi týraly zańyna sáikes, áskeri qyzmetshi mártebesi berilip, olarǵa qoiylatyn zań talaptarynyń barlyǵy júrgizilip otyrady», - dedi Ǵani Artyqov.
Bul azamattar qaladaǵy blokpost beketterinde qyzmet atqarýǵa jáne patrýldik qyzmetterge tartylyp, qaladaǵy dezinfektsiialyq jumystardy júrgizýge de jumyldyrylatyn bolady.
Áskeri jiynǵa shaqyrylýshynyń jumys orny men laýazymy saqtalady. Jumys anyqtamasy boiynsha, jalaqysy sol mólsherde tólenip otyrady. Al jumyssyz bolsa, eń tómengi jalaqy (42 myń teńgeden astam) kóleminde aqy tólenedi.
