Halyqaralyq "Hiýman Raits Ýotch" (HRW) quqyq qorǵaý uiymy Túrkimenstanda ótetin prezident sailaýy qarsańynda málimdeme jasap, erkin jáne taza sailaý ótetinine kúmán keltirgen.
Uiym taratqan málimdemede sóz bostandyǵy jáne aqparatqa qol jetimdilik joq elde azamattardyń sailaýda erkin tańdaý jasaýyna múmkindik berilmeitindigi aitylǵan.
"Túrkimenstanda eshqashan taza jáne ádiletti sailaý bolǵan emes. Mundai pikirdi eldegi adam quqyqtary jaǵdaiyn uzaq ýaqyttan beri baqylap kele jatqandyqtan aityp otyrmyz. Adam quqyǵy óreskel buzylǵan elde sóz bostandyǵy, ashyq baspasóz, erkin jinalý degen múldem bolmaidy", - dep atap ótedi HRW uiymynyń Eýropa jáne Ortalyq Aziia jónindegi jetekshisi Hiý Ýilliamson.
Ýilliamson Túrkimenstan biligi halyqaralyq úkimettik emes uiymdardy, solardyń ishinde "Hiýman Raits Ýotchty" eline jibermeitinin aitady.
"Túrkimenstannyń halyqaralyq áriptesteri úkimetke adam quqyqtarynyń qorǵalýy úshin, reforma jasalý úshin qysym jasaý kerek", - dep atap ótedi Hiý Ýilliamson.
Túrkimenstannyń qazirgi prezidenti 59 jastaǵy Gýrbangýly Berdymýhamedov elin 2007 jyldan beri basqaryp keledi. Ol prezident sailaýyna úshinshi jyl qatarynan túsip otyr. 2016 jyldyń qyrkúieginde Túrkimenstan jańa Konstitýtsiia qabyldady. Oǵan sáikes, prezident jeti jylǵa sailanady.
