QR Ǵylym jáne joǵary bilim ministri Saiasat Nurbek Qazaqstan ǵylymyn tanymal etý qajettigin aitty, dep habarlaidy QazAqparat.
Onyń aitýynsha, jańa ministrliktiń basty baǵyttarynyń biri – ǵylymdy dáripteý.
«Qazir ǵylymdy qaitadan tanymal, qyzyqty etý, ǵylymi mansaptan úlken mansaptyq tramplin jasaý óte mańyzdy. Búkil Marvel filmderin qarasańyzdar: Briýs Benner – Halk – ǵalym, Toni Stark – ǵalym. Barlyq keiipkerler – ǵalymdar. Innovator retinde, álemdi jáne elimizdi alǵa jyljytyp, jaqsartatyn adam retinde ǵalym mártebesin qaitarýymyz kerek», - dedi Saiasat Nurbek Úkimet otyrysynan keiin jýrnalisterge.
Óz sózinde Ǵylym ministri Oqý-aǵartý ministri Ashat Aimaǵambetovtiń muǵalim mártebesin qaitarǵanyn eske saldy.
«Dál osylai ǵalymnyń mártebesine de nazar aýdartqymyz keledi. Ǵalym – bolashaǵy zor mansap. Ǵalymdar rasynda da álemdi ózgertedi. Jáne eń bastysy, ǵalymdar qoldanbaly formatta ekonomikalyq jáne áleýmettik damýǵa, JIÓ-niń ósýine jáne basqa faktorlarǵa áser etedi. Iaǵni, ǵylym áleýmettik-ekonomikalyq damýdyń seriktesi jáne kómekshisi retinde de mańyzdy», - dedi Saiasat Nurbek.
