Foto: Akorda.kz
Memleket basshysy Ǵylym jáne joǵary bilim ministri Saiasat Nurbekti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesýde Prezident tapsyrmalaryn oryndaý úshin Joǵary bilim men ǵylymdy damytýdyń 2023-2029 jyldarǵa arnalǵan tujyrymdamasy qabyldanǵany týraly baiandaldy. Qujat atalǵan salany órkendetýdiń strategiialyq mindetteri men kórsetkishterin aiqyndaidy.
Ministrdiń aitýynsha, biyl qyrkúiek aiynan bastap Qazaqstanda bakalavriat baǵdarlamasy boiynsha stipendiia mólsheri 20 paiyzǵa, magistratýra men doktorantýrada 15 paiyzǵa kóbeidi. Joǵary oqý oryndaryndaǵy professor-oqytýshylar quramynyń jalaqysy 160 myń teńgeden 350 myń teńgege deiin, al ulttyq ýniversitetterde bul kórsetkish 228 myń teńgeden 400 myń teńgege deiin ósti.
Sonymen qatar stýdentter jataqhanalaryndaǵy oryn tapshylyǵy úsh ese, iaǵni 2022 jylǵy 55 050-den 2023 jylǵy qazanda 17 488-ge deiin azaidy.
Qasym-Jomart Toqaevqa joǵary bilim berý salasyndaǵy infraqurylym men tsifrlyq arhitektýranyń damýy, sonyń ishinde Ál-Farabi atyndaǵy QazUÝ men L.N.Gýmilev atyndaǵy EUÝ kampýstarynyń qurylysy týraly málimet berildi. Ministrlik tsifrlyq ýniversitet modelin ázirlep jatyr. Stýdentter Coursera jahandyq onlain bilim berý platformasynda oqý múmkindigine ie boldy. Qazirdiń ózinde olardyń 40 myńy sertifikat aldy. Platformadaǵy 100 negizgi kýrsty qazaq tilinde oqýǵa bolady.
Memleket basshysyna Qazaqstannyń álemdik bilim berý keńistiginde belsendi ilgerilep kele jatqany týraly baiandaldy. QS reitingine 21 joǵary oqý orny, al Times Higher Education reitingine 4 ýniversitet kiredi. Jyl sońyna deiin elimizde jumys isteitin jetekshi sheteldik ýniversitetter filialdarynyń sany segizge jetedi. Halyqaralyq kompaniialarmen birlesip, jasandy intellekt salasynda kadr daiarlaý isi bastaldy. «Mamandyǵym – bolashaǵym» jobasy aiasynda óńirlerde kadr qajettiligine forsait-zertteý júrgizý úshin jobalyq keńseler ashylyp jatyr.
Qasym-Jomart Toqaevqa berilgen málimet boiynsha Ulttyq ǵylym akademiiasynyń institýtsionaldyq róli kúsheiip keledi. Prezident janyndaǵy Ǵylym jáne tehnologiialar jónindegi ulttyq keńes óz jumysyn bastady. Ǵalymdardyń ortasha jalaqysy 2 ese ósip, 252 myń teńgege jetti. Irgeli zertteýlermen ainalysatyn ǵylymi-zertteý institýttary tikelei qarjylandyrylatyn boldy. Ǵylym salasynyń 2023-2025 jyldarǵa arnalǵan jalpy biýdjeti 3,3 ese artyp, 643 milliard teńgeni qurady.
Q.Sátbaev atyndaǵy Qazaq ulttyq tehnikalyq zertteý ýniversitetiniń ǵalymdary tazalyǵy 99,5 paiyz mólsherinde selen alý tehnologiiasyn oilap tapty. Bul himiialyq element meditsinada, elektronikada jáne shyny óndirisinde keńinen qoldanylady. Osy jańalyqtyń arqasynda Qazaqstan atalǵan sirek metaldy anaǵurlym tiimdi baǵamen eksporttai alady.
Kezdesý sońynda Memleket basshysy bilim berý deńgeiin arttyrý, innovatsiialardy yntalandyrý jáne ǵylymi zertteý jumystarynyń sapasyn jaqsartý, sondai-aq stýdentter jataqhanalaryndaǵy oryn tapshylyǵyn azaitý jóninde birqatar tapsyrma berdi.
