Foto ashyq derekkózden alyndy
Qasym-Jomart Toqaev "Qazaqstan Respýblikasy Prezidentiniń janyndaǵy Ǵylym jáne tehnologiialar jónindegi ulttyq keńesti qurý týraly" Jarlyqqa qol qoidy, - dep habarlaidy "Ult aqparat" Aqordaǵa silteme jasap.
Keńestiń qurylýy ulttyq ǵylymi júieni basqarý isin jetildirýge jáne Qazaqstan Respýblikasynyń ǵylym jáne ǵylymi-tehnikalyq qyzmet salasyndaǵy memlekettik saiasatty odan ári damytýdyń basym baǵyttaryn aiqyndaý boiynsha usynymdar ázirleýge yqpal etedi.
Qazaqstan Respýblikasy Prezidentiniń janyndaǵy Ǵylym jáne tehnologiialar jónindegi ulttyq keńestiń quramy men erejesi osy Jarlyqpen bekitildi. Keńes quramyna halyqaralyq deńgeide tanylǵan, ǵylymi-zertteý belsendiligi joǵary, ǵylymnyń basym baǵyttarynda eńbek etetin akademikter men ǵalymdar endi.
Sondai-aq keńes quramyna Berkli kosmologiialyq fizika ortalyǵynyń fizika jáne astrofizika professory, Nobel syilyǵynyń laýreaty Fitsdjerald Djordj Smýt III (AQSh), sondai-aq álemniń jetekshi ǵylymi ortalyqtarynda ǵylymi-zertteý jumystarymen ainalysatyn birqatar otandasymyz kirdi.
Sonymen qatar ǵylymi, ǵylymi-tehnologiialyq jáne innovatsiialyq saiasatty júzege asyrýǵa jaýapty Úkimet músheleri keńes quramyna endi.
Otandyq jáne sheteldik jetekshi ǵalymdardyń Ulttyq keńeske múshe bolýy Qazaqstan ǵylymyn damytýda perspektivti jáne strategiialyq mańyzdy sheshimder qabyldaýǵa oń septigin tigizedi.
