18 sáýir kúni QR Premer-ministriniń orynbasary Gúlshara Ábdiqalyqova bastaǵan Úkimet músheleri Elbasynyń «Áleýmettik qamqorlyq» jańa áleýmettik sharalaryn túsindirý úshin Soltústik Qazaqstanǵa keldi.
Delegatsiia quramynda Eńbek jáne halyqty áleýmettik qorǵaý ministri Berdibek Saparbaev, Bilim jáne ǵylym ministri Kúlásh Shámshidinova, Densaýlyq saqtaý ministri Eljan Birtanov, Qurylys isteri jáne turǵyn úi-kommýnaldyq sharýashylyq komitetiniń tóraǵasy Marhabat Jaiymbetov bar, dep habarlaidy QazAqparat.
Úkimettik delegatsiia óz jumysyn Oqýshylar saraiynda kópbalaly analarmen, az qamtamasyz etilgen otbasylarmen, eńbek ardagerlerimen, múgedektermen, muǵalimdermen, dárigerlermen jáne jergilikti jurtshylyqpen kezdesýden bastady.
Halyq aldynda sóz sóilegen vitse-premer jańa áleýmettik saiasat basymdyqtaryna toqtalyp ótti. Búgingi kúni memleket halyqtyń ómir súrý deńgeiin arttyrý boiynsha barlyq qajetti sharalardy qabyldap jatyr. Basty maqsat - adamdarǵa jumys berý. Sonymen qatar, halyqtyń áleýmettik osal sanatyna jan-jaqty qoldaý kórsetiletinin erekshe atap ótti.
Jumys tobynyń músheleri halyqty áleýmettik qoldaý salasynda, turǵyn úi máselesin sheshýde, bilim jáne densaýlyq saqtaý júielerin damytýda iske asyrylyp jatqan sharalar týraly aitty jáne oblys turǵyndarynyń suraqtaryna jaýap berdi.
Budan ári Premer-ministrdiń orynbasary Eńbek jáne halyqty áleýmettik qorǵaý ministri B.Saparbaevpen, oblys ákimi Q.Aqsaqalovpen birlesip, «S.M.Kirov atyndaǵy zaýyt» aktsionerlik qoǵamynyń bazasynda qalalar, aýdandar ákimderimen, ónerkásip kásiporyndarynyń, biznes-qurylym, kásipodaq uiymdarynyń basshylarymen kezdesý ótkizdi. Áleýmettik áriptestikti damytý jáne biznestiń áleýmettik jaýapkershiligi máselelerin qarastyra otyryp, Gúlshara Ábdiqalyqova kásiporyn direktorlaryn jáne kompaniia basshylaryn az qamtamasyz etilgen otbasylardyń eńbekaqysyn arttyryp, baspana máselesin sheship, áleýmettik paketterin keńeite otyryp naqty kómek kórsetýge shaqyrdy.
Jumys saparynyń sońynda vitse-premer Eńbek jáne halyqty áleýmettik qorǵaý, Bilim jáne ǵylym ministrlerimen birlesip, «Eńbek» 2017 - 2021 jyldarǵa arnalǵan jumyspen qamtýdyń nátijeliligi jáne jappai kásipkerlikti damytý memlekettik baǵdarlamasy jáne «Serpin-2050» «Máńgilik el jastary - indýstriiaǵa» baǵdarlamalary aiasynda eńbek resýrstarynyń mobildiligin arttyrý barysy týraly keńes ótkizdi.
Oǵan videokonferentsiia bailanys rejiminde múddeli ortalyq jáne jergilikti atqarýshy organdarynyń, bilim berý mekemeleriniń ókilderi, sondai-aq baǵdarlamaǵa qatysýshylar qosyldy.
Búginde Soltústik Qazaqstan oblysynda 1411 stýdent «Serpin-2050» baǵdarlamasy boiynsha oqyp jatyr, al «Eńbek» memlekettik baǵdarlamasy aiasynda óńirlik kvotaǵa 43 túlek engizildi. Kvotaǵa engizilgenderdiń barlyǵyna 10,9 mln. teńge somada, sonyń ishinde - 3,6 mln. teńge somada kóshýge sýbsidiia jáne 7,6 mln. teńge somada turǵyn úidi jaldaý nemese satyp alý shyǵynyn toltyrýǵa sýbsidiia tóleý túrinde memlekettik qoldaý kórsetildi.
Keńes qorytyndysy boiynsha joǵary oqý oryndary men kásiporyndar arasynda memorandýmdar jasaý jolymen túlekterdi jumysqa ornalastyrý máselesi boiynsha tyǵyz ózara is-qimyl qajettigi týraly basa aityldy. Ortalyq jáne óńirlik deńgeide de jobalardy iske asyrýǵa monitoring jasaýdy ózektilendirý qajettigi aityldy. Naryq suranysyna sáikes qajettilikke ie kadrlardy daiyndaýǵa jáne túlekterdi oqyǵan jeri boiynsha jumysqa ornalastyrýǵa basa nazar aýdaryldy.
Jumys tobynyń basqa músheleri oblystyń ártúrli aýdandaryna shyqty. Mysaly, Densaýlyq saqtaý ministri E.Birtanov Aqqaiyń aýdanyna, Qurylys jáne turǵyn úi-kommýnaldyq sharýashylyq isteri komitetiniń tóraǵasy M.Jaiymbetov Petropavl qalasyndaǵy qurylys obektilerine bardy. Olar emdeý-profilaktikalyq mekemelerdi, sondai-aq qurylys jáne turǵyn úi-kommýnaldyq sharýashylyq obektilerin aralady.
Úkimet músheleriniń jumys sapary Shyǵys Qazaqstan oblysynda jalǵasady.
