Foto: Khabar kadry
Gúlmira Satybaldy sotqa qatysýy úshin Almatyǵa jetkiziledi, - dep habarlaidy "Ult aqparat" Tengrinews.kz-ke silteme jasap.
Gúlmira Satybaldynyń isi boiynsha, aldyn ala tyńdaýda sýdia Mártpek Kákimjanov qorǵaýshynyń qylmystyq isti qysqartý týraly ótinishin qanaǵattandyrýdan bas tartty.
Sýdia qorǵaýshynyń ýájderi is materialdarynda bar dáleldemelerdi taldaýǵa negizdelgenin, biraq sot aldyn ala tyńdaý kezinde bul dáleldemelerge baǵa bere almaitynyn, sebebi olar negizgi sot talqylaýy barysynda jábirlenýshilerden, kýálardan jaýap alý jáne oqý arqyly zertteletinin atap ótti. Aiyptaý aktiniń ózinde eshqandai zań buzýshylyqtar joq.
Sonymen qatar, sýdia sot protsesin jabyq túrde jáne onlain ótkizý týraly ótinishti qanaǵattandyrmady. Sýdianyń aitýynsha, buǵan qylmystyq is júrgizý kodeksinde kózdelgen memlekettik qupiialardy qorǵaý múddesi nemese kámeletke tolmaǵan adamǵa qatysty is siiaqty negiz joq.
Sondai-aq, advokattarǵa sot talqylaýy kezindegi dáleldemelerdi zertteý nátijeleri boiynsha qylmystyq isti qysqartý týraly ótinishti qaita berýge bolatyny túsindirildi.
"Almaty qalasynyń qylmystyq ister jónindegi mamandandyrylǵan aýdanaralyq sotynda negizgi sot talqylaýy ashyq sot otyrysy formatynda ótsin. Bultartpaý sharasy ózgerissiz qalady. Sottalýshy Gúlmira Satybaldy Qaýasqyzy Astana qalasynyń mekemesinen Almaty qalasynyń №78 mekemesine jetkizilsin", - dep sheshti sýdia.
Alǵashqy sot otyrysy 30 mamyrda saǵat 10:00-de Almaty qalasynyń qylmystyq ister jónindegi mamandandyrylǵan aýdanaralyq sotynda ashyq rejimde ótedi. Sot otyrysy aptasyna eki ret – dúisenbi jáne beisenbi kúnderi ótedi.
