Grýziiada óz-ózine qol jumsap qaitys bolǵan jerlesimiz Ásel Aitbaevanyń isine qatysty sot sheshimi shyqty, dep habarlaidy QazAqparat.
«2022 jylǵy 2 tamyzda Nur-Sultan qalasynyń qylmystyq ister jónindegi mamandandyrylǵan aýdanaralyq sotynda M-ge qatysty jábirlenýshiniń dármensiz kúiin paidalanyp zorlaý (QK-tiń 120-babynyń 1-bólimi), sondai-aq abaisyzda jábirlenýshi A.-nyń ólimine ákep soqqan adamdar tobynyń aldyn ala sóz bailasýymen adamdy satý faktisi boiynsha aiyptaý úkimi shyǵaryldy (QK-tiń 128-babynyń 2-bólimi 4-tarmaǵy)», - dep habarlaidy elorda sotynan.
Sotta anyqtalǵandai, M jábirlenýshi A-ǵa Grýziiada 500 AQSh dollar jalaqy tóleitin jumys usynyp, atalǵan elge barýyna kómektesken.
«Aiypty M jábirlenýshi A-nyń uiqyly-oiaý kúiin jáne dármensizdigin paidalanyp ony zorlaǵan. Odan keiin M jábirlenýshini jynystyq qatynasqa májbúrleý arqyly paida tabý maqsatynda Grýziia azamaty B-ǵa tapsyrǵan. Sodan soń jábirlenýshi A zorlyq-zombylyqtan qutylý úshin 9 qabattan sekirip, mert boldy», - deidi vedomstvodan.
Habarlamada aitylǵandai, prokýror sottalýshyǵa zorlaý faktisi boiynsha (QK-tiń 120-babynyń 1-bólimi) 5 jylǵa jáne adamdy satý faktisi boiynsha (QK-tiń 128-babynyń 2-bólimi 4-tarmaǵy) 11 jyl 3 ai merzimge bas bostandyǵynan aiyrý jazasyn taǵaiyndaýdy surady.
Osylaisha kánilini jalpy merzimi 15 jylǵa bas bostandyǵynan aiyra otyryp, jazasyn maksimaldy qaýipsizdiktegi mekemede óteý usynyldy.
Degenmen sot habarynda jazylǵandai jábirlenýshiniń ókilderi 15 jyl emes 20 jylǵa bas bostandyǵynan aiyrýdy talap etken. Sonymen qatar sotta isti bolǵan M ózine taǵylǵan aiypty moiyndamaǵan.
«Sottalýshynyń advokaty qorǵaýshysynyń is-áreketinde qylmys quramynyń bolmaýyna bailanysty ony aqtaýdy surady. Degenmen onyń kinási kýálardyń túsinigimen, aýdio jáne beine habarlamalarmen, saraptama qorytyndylarymen jáne istiń basqa da materialdarymen dáleldendi», - delingen resmi aqparatta.
Osy oraida elorda sotynan zań talaptaryn basshylyqqa alý mindetti ekeni habarlandy.
«QR Qylmystyq Kodeksiniń 120-baby 1-bóliminiń sanktsiiasy 5 jyldan 8 jylǵa deiingi merzimge bas bostandyǵynan aiyrýdy kózdeidi jáne aýyr qylmys sanatyna jatady. Osy bap boiynsha M.-ge 5 jyl 3 aiǵa bas bostandyǵynan aiyrý jazasy taǵaiyndaldy. Qylmystyq Kodekstiń 128-baby 2-bólimi 4-tarmaǵynyń sanktsiiasy múlkin tárkilei otyryp 7 jyldan 9 jylǵa deiingi merzimge bas bostandyǵynan aiyrýdy kózdeidi jáne bul da aýyr qylmys retinde sanalady. Atalǵan bap boiynsha M.-ge 11 jyl 3 aiǵa bas bostandyǵynan aiyrý jazasy taǵaiyndaldy», - degen sheshim shyǵardy elorda soty.
Zańǵa sáikes jazanyń maksimaldy merzimin aýyr qylmystar boiynsha 2/3, asa aýyr qylmystar boiynsha ¾ asyrýǵa jatpaidy.
«Osyǵan bailanysty sot qylmystyq zańnyń talaptary sheńberinde sottalýshyǵa maksimaldy jazany taǵaiyndady. M 15 jylǵa bas bostandyǵynan aiyrýǵa sottaldy. Is boiynsha jaýaptylyq pen jazany aýyrlatatyn mán-jailar anyqtalmady. Jeńildetetin mán-jai retinde M.-nyń asyraýynda jas balalarynyń bar bolýy eskerildi», - dep tolyqtyrdy vedomstvodan.
Úkim zańdy kúshine engen joq.
Eske salaiyq, ótken jyldyń 5 mamyrynda Grýziiada 26 jastaǵy Ásel Aitbaevanyń denesi tabylǵan bolatyn. Ólim aldynda ol dosyna aýdio habarlama jiberip úlgergen. Aýdioda er adamnyń ony zorlyqpen qorqytyp jatqany jazylǵan.
Grýziia prokýratýrasy boijetkenniń zorlanǵanyn málimdedi. Kúdikti – 56 jastaǵy Besik Tordýa kelesi kúni ustaldy. Ol zorlaý jáne ózin-ózi óltirýge itermelegeni úshin 8 jyldan 10 jylǵa deiin bas bostandyǵynan aiyrylýy múmkin edi. Alaida Tordýa keiin túrme aýrýhanasynda qaitys boldy.
Grýziianyń bas prokýratýrasy taǵy bir kúdiktige – Áseldiń týysy Murat Meiirbekovke de aiyp taqqan. Ony Nur-Sultan politsiiasy biyl 16 mamyrda ustaǵan edi. Meiirbekov qyzdy jumysqa turǵyzý syltaýymen ony Grýziiada eksplýatatsiialaý aiybyna ilikken.
