Mihail Saakashvilidi politsiia qyzmetkerleri áketip barady. Tbilisi, Grýziia. 1 qazan, 2021 jyl.
1 qazanda keshkisin ótken tótenshe brifingte Grýziia premer-ministri Iraklii Garibashvili ishki ister ministrligi men memlekettik qaýipsizdik qyzmetiniń birlesken operatsiiasy kezinde eldiń burynǵy prezidenti Mihail Saakashvili tutqyndalǵanyn málimdedi, dep habarlaidy Azattyq.
Garibashvilidiń aitýynsha, eldiń arnaiy qyzmeti eks-prezidenttiń Ýkrainadan Grýziiaǵa kelgen izin ańdyp otyrǵan. Saakashvili Rýstavi qalasyndaǵy ýaqytsha qamaý izoliatoryna jatqyzylǵan.
Grýziia ishki ister ministrligi qoly kisendelgen Saakashvilidi kólikten túsirip, ǵimaratqa kirgizip bara jatqan video jariialady.
Sol kúni Saakashvili Grýziianyń Batými qalasynda júrgenin kórsetip video túsirip, onysyn Internette jariialaǵan.
Onyń elge qalai kirgeni áli anyq emes. Saakashvili segiz jyldan beri shetelde turyp jatyr. Budan buryn ol áleýmettik jelide Grýziiaǵa baratyn ushaqqa bilet alǵanyn aityp, onyń sýretin de jariialaǵan.
Tbilisi soty Mihail Saakashvilidi qyzmet babyn asyra paidalanǵany úshin úsh jáne alty jylǵa bas bostandyǵyn aiyrý jazasyna kesken.
Ýkraina syrtqy ister ministri Kievtegi Grýziia elshisin shaqyryp, Saakashvilidiń tutqyndalýynyń jai-japsaryn suraǵan.
Ýkraina prezidenti Vladimir Zelenskii Grýziia eks-prezidentiniń tutqyndalýy jáne oǵan qatysty Grýziiada aitylyp málimdemelerdiń "saryny" alańdatatynyn aitty.
"Raýshangúl revoliýtsiiasynan" soń bilikke kelgen Mihail Saakashvili 2004-2013 jyldary el basqaryp, merzimi aiaqtalǵannan keiin qyzmetinen ketken.
