Grýziia halqynyń shamamen 21,3%-ynyń jaǵdaiy absoliýtti kedeilik sheginen tómen. Buǵan Grýziia ulttyq statistika basqarmasy jariialaǵan 2020 jylǵa arnalǵan kedeilik kórsetkishiniń sońǵy derekteri dálel, dep habarlaidy "Ult aqparat" Grýziia jańalyqtary portalyna silteme jasap.
Absoliýtti kedeilik sheginen tómen ómir súretin halyqtyń úlesi 2019 jylmen salystyrǵanda 2020 jyly 1,8%-ǵa ósti. Statistikaǵa sáikes, 2019 jyly Grýziia halqynyń 19,5%-y absoliýtti kedeilik sheginen tómen ómir súrdi.
Sonymen qatar osy sanatqa jatatyn azamattardyń kópshiligi eldiń aýyldyq jerlerinde turady. Statistikter absoliýtti kedeilik sheginen tómen ómir súretin halyqtyń úlesi 2020 jyly Grýziianyń aýyldyq bóliginde 27,5% jáne qalalarda 17,1% quraǵanyn aityp otyr.
Ulttyq statistika qyzmetiniń resmi málimetterine sáikes, Grýziia halqy azdap ósti jáne 2021 jyldyń 1 qańtarynda 3 728 600 adamdy qurady.
2020 jyly ortasha ailyq tabys otbasyna 6,4%-ǵa tómendep, 1100,5 laridi (1 lari – 131 teńge) qurady, al halyqtyń jan basyna shaqqanda 4,4%-ǵa tómendep, 321,4 laridi qurady.
Budan bólek, 541 764 adam nemese Grýziia halqynyń 14,5%-y memleketten áleýmettik kómek alady jáne bul kórsetkish ótken jyly 83 296 adamǵa artty, dep habarlaidy Grýziianyń áleýmettik qyzmet kórsetý agenttigi.
151 myń otbasy úshin áleýmettik kómek - jalǵyz tabys kózi dep habarlaidy agenttik.
Ótken jyly áleýmettik kómekke Grýziianyń memlekettik biýdjetinen 339 277 444 lari bólindi, al 2021 jyldyń alǵashqy úsh aiynda bul maqsatqa 89 818 591 lari aýdaryldy.
