Grekiianyń Lesbos aralynda bosqyndar turatyn lager órtenip ketti. Buǵan deiin, seisenbiden sársenbige qaraǵan túni bolǵan birinshi órt kezinde lager qatty zardap shekken edi. Bul týraly BBC agenttigi habarlady.
Abyroi bolǵanda, qaza tapqandar joq, alaida keibir migranttar iis tiip ýlanǵan. Bastapqyda 3 myń adamǵa eseptelgen lagerde 13 myńǵa jýyq adam turǵan. Bul – 70 eldiń migranttary, kóbi aýǵandyq azamattar bolǵan. Buǵan deiin Grekiianyń premer-ministri Kiriakos Mitsotakis bolǵan oqiǵada bosqyndardyń ózderin kinálaǵan.
Onyń aitýynsha, olar 35 migranttan koronavirýs anyqtalǵan soń, úlken agressiiaǵa jol bergen. El biligi aýrýǵa shaldyǵyp, karantinnen qashyp ketpek bolǵan barlyq migranttardy ustaǵanyn aitty.
Órtten keiin bosqyndarǵa lager aýmaǵynan ketýge ruqsat etildi, alaida politsiia olardyń kórshiles eldi mekenderge kirýin boldyrmaý úshin joldardy jaýyp tastady. Myńdaǵan adam panasyz qalǵan. El biligi olarǵa ýaqytsha baspana izdep júr. Germaniianyń Syrtqy ister ministri Haiko Maas bolǵan oqiǵany gýmanitarlyq apat dep atap, Tvitterde bosqyndardy olardy qabyldaýǵa daiyn bolǵan EO elderine úlestirý qajettiligi týraly jazdy. Kelip jatqan habarlamalarǵa sáikes, kórshiles kenttiń turǵyndary bosqyndardy ózderiniń eldi mekeninen ary qarai ótkizbeidi.
BUU Joǵarǵy komissarynyń bosqyndar isi jónindegi basqarmasy bosqyndar men jergilikti turǵyndar arasyndaǵy qatynastyń shielenisýi jaiynda biletinin málimdedi. «Biz barlyǵyn sabyrlylyq tanytýǵa jáne lagerde bolǵandardyń barlyǵyn ýaqytsha sheshim tabylmaiynsha óz oryndarynda qalýyn suraimyz», - delingen basqarma málimdemesinde.
Araldyń órt sóndirý bóliminiń bastyǵy Konstantinos Teofilopýlos órt seisenbiden sársenbige qaraǵan túni birden úsh jerde bolǵanyn jetkizdi.
Onyń aitýynsha, migranttar órt sóndirýshilerge jalyndy sóndirýge kedergi keltirgen. Jalyn sársenbi tańyna qarai sóndirildi.
Tergeýshiler ádeii órtep jiberý nusqasyn da qarastyryp otyr, biraq buǵan aiǵaq dálel joq.
