Grekiiada Afinadaǵy jeke meditsinalyq ortalyqtardyń birinde plazmaferez (qan tazartý) protsedýrasy kezinde belgili ánshi, 54 jastaǵy Iorgos Mazonakistiń júregi toqtap, qaitys bolýyna bailanysty politsiia tergeý júrgizip jatyr, dep habarlaidy ult.kz.
Tergeýshiler protsedýranyń qanshalyqty durys jasalǵanyn jáne klinikanyń mundai meditsinalyq qyzmetti kórsetýge resmi ruqsatynyń bolý-bolmaýyn tekserýde.
Grekiialyq BAQ-tyń habarlaýynsha, qaiǵyly oqiǵadan keiin eki dáriger ustaldy. Quqyq qorǵaý organdary plazmaferez apparaty keminde 45 minýt boiy qosýly turǵanyn jáne jumys istegenin anyqtady.
Ustalǵan meditsina mamandary protsedýra «tipti bastalyp ta úlgermedi», ánshiniń jaǵdaiy ekinshi venaishilik kateterdi ornatý sátinde nasharlady dep sendirýde. Degenmen, qurylǵynyń 45 minýttyq jumys tsikly qandy tazartý protsesiniń bastalyp ketkenin aiǵaqtaidy.
Shuǵyl shaqyrýmen jetken jedel járdem brigadasy ártiske jetkende onyń tamyr soǵysy bilinbegen. Keiin «Elpis» aýrýhanasyna jetkizilip, reanimatsiialyq sharalar jasalǵanymen, ánshiniń ómirin saqtap qalý múmkin bolmady.
Grekiia Densaýlyq saqtaý ministri Adonis Georgiadis atalǵan meditsinalyq ortalyqtyń tek terapiialyq kabinet retinde tirkelgenin jáne olardyń plazmaferez protsedýrasyn júrgizýge eshqandai litsenziiasy bolmaǵanyn málimdedi.
Afina meditsinalyq qaýymdastyǵynyń tóraǵasy Iorgos Patýlis ta bul ortalyqtyń plazmaferez apparatyn qoldanýǵa quqyǵy joq ekenin rastady.
