QR Mádeniet jáne sport ministri Arystanbek Muxamediuly sportta jetistigi bar jastardy joǵary oqý ornyna qabyldaýǵa qatysty pikir bildirdi, dep xabarlaidy QazAqparat tilshisi.
«Ókinishke qarai, atalǵan másele bilim jáne ǵylym ministrliginiń quziretine jatady. Degenmen, biz sportta jetistigi bar jastar laiyqty bilim alýlary qajet dep sanaimyz. Sebebi olar elimizdi xalyqaralyq dárejede nasixattap júr. Bul jerde bir nárseni túsiný kerek, adam bar kúsh-jigerin sportqa salyp jatsa, testke daiyndalýǵa ýaqyty bolmaidy, qoly timeidi. Tómen kórsetkishter de sodan. Sol sebepti aldaǵy ýaqytta biz osy máseleni eskerýimiz kerek. Ondai azamattardyń eńbegine qurmetpen qaraý qajet. Olardyń joǵary bilim alýǵa degen qulshynysy meni qatty qýantady. Sportshylar óz sheberligin, óz bilimin shyńdaýǵa tyrysyp jatyr. Osyny qoldaýymyz qajet», - dedi A.Muxamediuly jýrnalisterge bergen suxbatynda.
Ministrdiń aitýynsha, aldaǵy ýaqytta QR Bilim jáne ǵylym ministrligimen birge arnaiy komissiiany qurý josparlanýda. Negizgi maqsat - barlyq kelispeýshilikterdi rettep otyrý.
«Biz qol qýsyryp otyrǵan joqpyz. Tiisti jumysty atqaryp jatyrmyz. Osy máseleni abyroimen sheshýimiz kerek. Negizi, quziretti memlekettik organdar sporttyń ǵana emes, ónerdiń de, mádeniettiń de ózindik erekshelikterin eskerse eken deimiz», - dep atap kórsetti A.Muxamediuly.
Aita keteiik, biyl sportta jetistigi bar kóptegen jastar grantqa ilige almai qaldy. Olar osy saladaǵy bas joǵary oqý orny - Qazaq sport jáne týrizm akademiiasyna qujat tapsyrǵan. Alaida tegin oqýǵa túse almady. Sebebi aǵymdaǵy jyldan bastap memlekettik tapsyrysty taratý zańnamasyna birqatar ózgerister engizildi. Atap aitqanda, grant taǵaiyndaý kezinde tek ulttyq biryńǵai testileýdiń nátijesi ǵana eskeriledi. Al eki talapker birdei upai jinasa, sport jetistikterine basymdyq beriledi.
