Memlekettik bilim grantyn utyp alýǵa niettengen úmitkerler Ulttyq biryńǵai testileýdi eki márte tapsyra alady. Bul týraly QR BǴM joǵary jáne joǵary oqý ornynan keiingi bilim departamentiniń direktory Ádilet Toibaev aitty, dep habarlaidy QazAqparat.
«Burynǵydai bir ǵana múmkindik emes, endi tapsyrýǵa eki múmkindik bolady», - dedi Toibaev Ortalyq kommýnikatsiialar qyzmetinde.
Bilim ministrliginiń málimetinshe, eger talapker sáýir aiynda testileýden ótken bolsa, onyń UBT-ny ekinshi ret birneshe kúnnen keiin nemese mamyr ne maýsym ailarynda tapsyrý múmkindigi bolady. Testileýge bir kúnde 2 ret qatysýǵa tyiym salynady. Memlekettik bilim berý grantyn alý konkýrsyna qatysý úshin oqýǵa túsýshi eń jaqsy nátijesi bar sertifikatty usyna alady. Bul múmkindik úmitkerlerdiń grant utyp alý múmkindigin aitarlyqtai arttyra túspek.
UBT-ny ádettegidei 3 mindetti jáne 2 beiindi pán boiynsha tapsyrady. Qatysýshylarǵa 120 test tapsyrmasy beriledi, onyń ishinde Qazaqstan tarihy boiynsha – 15, matematikalyq saýattylyq boiynsha – 15, oqý saýattylyǵy boiynsha – 20 jáne eki beiindik pán boiynsha 35 tapsyrmadan.
Taratylǵan málimetke qaraǵanda, testileýge 4 saǵat (240 minýt) beriledi. UBT nátijesi boiynsha talapkerler eń joǵary 140 ball jinai alady.
Qatysýshylar tapsyrmalardy kez-kelgen pánnen bastai alady. Sondai-aq testileý aiaqtalǵanǵa deiin jaýap berilgen suraqtarǵa qaita oralyp, jaýaptardy túzetýge bolady. Talapkerlerge yńǵaily bolý úshin UBT barysynda kompiýter ekranynda kalkýliator, Mendeleev jáne tuzdardyń erigishtigi kesteleri qoljetimdi bolady.
Sonymen birge testileýdiń 60 minýtynan keiin oqýshylarǵa kózge arnalǵan jáne dene jattyǵýlaryn oryndaý úshin eki minýttyq úzilis, 120 minýttan keiin 15 minýttyq úzilis beriledi.
