Foto: Qazaqkontsert
Roza Baǵlanova atyndaǵy «Qazaqkontsert» memlekettik akademiialyq kontserttik uiymy 64-shi kontserttik maýsymyn sátti aiaqtap, «GRAND FEST» mýzykalyq festivali aiasynda birqatar kontserttik baǵdarlamalardy kórermen nazaryna usyndy, dep habarlaidy Ult.kz.
Jalpy alǵanda, «Qazaqkontsert» uiymy 64-shi kontserttik maýsym aiasynda 82 kontsert, 3 iri shyǵarmashylyq joba jáne kóptegen memlekettik mańyzy bar is-sharalardy uiymdastyrdy. Atap aitqanda, «Roza Baǵlanova» atyndaǵy halyqaralyq vokaldyq konkýrsy, «Serper» ulttyq óner konkýrsy jáne «Meniń Qazaqstanym» atty Shámshi Qaldaiaqov ánderiniń halyqaralyq festivali júzege asyryldy. Sonymen qatar, uiymnyń ártisteri Frantsiia, Ulybritaniia, Italiia, Kanada, Túrkiia, Ispaniia, Chehiia, Bolgariia, Belarýs, Majarstan, BAÁ,Tájikstan, Resei Federatsiiasy, Túrkimenstan, Grýziia, Armeniia, Latviia jáne Ázerbaijan sekildi 22 shet memleketke gastroldik saparmen baryp, qazaq ónerin álem sahnalarynda pash etti. Oǵan qosa Qostanai, Aqmola, Shyǵys Qazaqstan, Ulytaý, Qyzylorda, Túrkistan, Jambyl, Jetisý jáne Almaty oblystaryn qamtyǵan 17 respýblikalyq gastroldik sapar barysynda elimizdiń túkpir-túkpirinde ulttyq mádenietti keńinen dáriptedi.
Foto: Qazaqkontsert
Sondai-aq, Qazaqkontsert ártisteri men shyǵarmashylyq ujymdary «Qazaqstannyń halyq ártisi», «Qazaqstannyń eńbek sińirgen qairatkeri», «Eren eńbegi úshin», «Barys» ordeni syndy 12 memlekettik marapatqa ie boldy. Buǵan qosa «Qazaqstan halqy assambleiasyna 30 jyl» tósbelgisimen, «Dala dauysy» jáne Amerika, Resei, Grýziia memleketterinde ótken 7 respýblikalyq jáne halyqaralyq baiqaýlarda júldeli oryndarǵa qol jetkizdi.
29 maýsym kúni Astanadaǵy Amfiteatrda Qazaqkontserttiń 64-shi kontserttik maýsymyn qorytyndylaityn Gala-kontsert ótti. Bul keshte otandyq estrada juldyzdary, tanymal sahna sheberleri men jas talanttar bas qosyp, ashyq aspan astynda keń kólemdi mýzykalyq shoý usyndy.
Foto: Qazaqkontsert
Kontserttik baǵdarlamada tanymal kompozitsiialar, zamanaýi aranjirovkalar, orkestrlik súiemeldeý jáne ashyq aspan astyndaǵy merekelik atmosfera usynyldy. El esinde saqtalǵan súiikti ánder jańasha árlenip, jandy oryndaýda kórermenge jol tartty. Olardyń qatarynda «Sálem saǵan, týǵan el», «Jan dosym», «Aq dariǵa», «Qazaq eli», «Jelsiz túnde jaryq ai», «Ahaý kerim» syndy halyq júreginen oryn alǵan týyndylar bar.
Is-sharaǵa «Qazaqkontserttiń» tanymal solisteri men shyǵarmashylyq ujymdary qatysty: Qazaqstannyń halyq ártisi Maqpal Júnisova, Qazaqstannyń eńbek sińirgen ártisi Nurlan Ónerbaev, Qazaqstannyń eńbek sińirgen qairatkerleri Súleimen Ibragimov, Qurmash Mahan, Klara Tólenbaeva, Gúlsim Myrzabekova, Azamat Jyltyrkózov, Bibigúl Januzaq, «Eren eńbegi úshin» tósbelgisiniń iegerleri Altynshash Muqataeva, Anna Ývarova, «Mádeniet salasynyń úzdigi» tósbelgisiniń iegeri Perizat Turar, «Daryn» memlekettik jastar syilyǵynyń laýreaty Azat Málik, halyqaralyq jáne respýblikalyq baiqaýlardyń laýreattary Dariia Bekpembet, Aiaýlym Qamajan, Didar Abdýhalyk, Aqbópe Álibekova, Asylhan Shalqarov, Erbol Tájibaev, Nursultan Anýarbek, Nursezim Samatqyzy sondai-aq, Qazaq memlekettik simfoniialyq orkestri, «Gúlder» jáne «Birlik» ansamblderi, «TURAN» etno-folklorlyq ansambli, «SAZ&SOUL» toby jáne «Astana Musical» memlekettik teatry.
Foto: Qazaqkontsert
