4 qarasha kúni Parijde Frantsiiadaǵy eń prestijdi ádebi marapat sanalatyn Gonkýr premiiasyn tabystaý saltanaty ótti.
Biyl Jan-Pol Diýbýa esimdi jazýshy laýreat atandy. Onyń "Barlyq adam birdei ómir súrmeidi" (Tous les hommes n'habitent pas le monde de la même façon) atty romany óte joǵary baǵalandy. Diýbýanyń ózi bul marapatty tabystaý rásiminde "adam sengisiz kúi keshkenin" aitty.
Gonkýr premiiasynyń ádilqazylar alqasy "Barlyq adam birdei ómir súrmeidi" týyndysyn "joǵalǵan baqytty saǵyný týraly nostalgiialyq roman" dep habarlady. Jalpy Diýbýanyń shyǵarmashylyǵyna Filip Rot pen Djon Apdaik syndy amerikalyq jazýshylar yqpaly zor bolǵan.
Osy negizgi marapattan bólek, Gonkýr akademiiasy jyl saiyn roman, poeziia, novella, biografiia janrlary boiynsha úzdik debiýtterdi anyqtap otyrady.
Sońǵy ýaqyttarda ózge elderde turatyn frantsýz tildi jazýshylar da elene bastady. Mysaly, Frantsiia Institýty Shyǵys (Livan) pen Eýropanyń (Italiia, Polsha, Rýmyniia, Serbiia) birqatar jazýshylaryn marapattady.
Esterińizge sala keteiik, Gonkýr premiiasy (Prix Goncourt) 1903 jyldan beri tabystalyp keledi. Byltyr Nikolia Mate esimdi jazýshy laýreat atanǵan edi. Ádilqazy alqasy avtordyń "Ózderinen keiin balalary" (Leurs enfants après eux) atty romanyn frantsýz tilindegi (2018 jylǵy) úzdik týyndy dep tanydy.
"Ózderinen keiin balalary " — Nikolia Mateniń ekinshi romany. Shyǵarma siýjeti 1990 jyldardaǵy Frantsiiada bolady. Basty keiipkerler — 14 jastaǵy Antoni men onyń dostary. Jasóspirim shaǵy ekonomikalyq daǵdarys kezine sáikes kelgen balalar Nirvana syndy rok grýppalar mýzykasyna elitip, ainala haosqa ainalǵan shaqta óz jónimen ómir keship jatady.
