Bas konsýldyq Gonkongtaǵy jaǵdaiǵa bailanysty qazaqstandyq stýdentterge qala aýmaǵynan ketýdi usyndy, dep habarlaidy "Ult aqparat" SIM resmi ókili Aibek Smadiiarovqa silteme jasap habarlaidy.
«Búgingi tańda Gonkongtan 208 stýdent ketip qaldy. Jaqyn arada taǵy 14 stýdent qala aýmaǵynan shyǵady dep josparlanýda. Bizdiń keibir stýdentterimiz Gonkongtan qazaqstandyq diplomattardy habardar etpei ketýde. Degenmen Gonkongte tótenshe jaǵdai engizilmegenin atap ótemiz. Biz tek bizdiń stýdentterge ǵana Qazaqstanǵa qaityp kelýdi usynamyz, óitkeni ýniversitetter kelesi semestr bastalǵanǵa deiin – iaǵni 2020 jyldyń qańtaryna deiin sabaqtardy toqtatty. Bul - tek usynys, eshkimdi qaladan ketýge májbúrlei almaimyz. Qalada qalǵan barlyq stýdenttermen diplomattar bailanys ornatyp, olarǵa árdaiym qajetti kómek kórsetýge daiyn», - dedi Aibek Smadiiarov.
Búginde konsýldyq esepte 195 stýdent tur, biraq bizben bailanysqa 250-ge jýyq stýdent shyqty. Biz olardyń barlyǵyna kómektesýdemiz, konsýltatsiialyq kómek kórsetemiz, qajet bolǵan jaǵdaida áýejaiǵa deiin jetkizýdemiz. Stýdentterdiń bir bóligi ózderin qaýipsiz sezinýine bailanysty Gonkongta qalýǵa niet bildirdi.
«Gonkong aýmaǵynan ketý usynystary tek bizdiń stýdentterimizge ǵana qatysty ekenin taǵy bir márte atap ótkim keledi. QR azamattaryn qaýipsizdik jaǵdaiy turaqtanǵansha Gonkongqa asa qajettiliksiz barmaýǵa shaqyramyz. Gonkongta bolýǵa májbúr bolǵan azamattardy barlyq qajetti saqtyq sharalaryn qabyldaýdy suraimyz. Jaǵdaidyń mán-jaiyn BAQ-ta jáne Gonkongtaǵy Qazaqstannyń Bas konsýldyǵynyń resmi saitynda baqylap otyrýǵa bolady», - dedi A.Smadiiarov.
