Gonkongta ustalǵan qazaq stýdentiniń soty 2020 jyldyń qańtarynda ótedi. Bul týraly búgin QR Syrtqy ister ministrliginiń resmi ókili Aibek Smadiiarov aitty, dep habarlaidy "Ult aqparat".
«Sotyn kútip otyrmyz. Tergeý júrip jatyr. Soty kelesi jyldyń qańtar aiynyń ortasyna josparlanǵan. Ózderińiz biletindei, ol jaqta kóp adam ustaldy. Ýaqyty kelgende soty bolady. Sol sotta sheshim qabyldanady. Advokat taptyq, týystary Gonkongqa bardy. Olarmen kezdesý ótkizdik. Quqyqtyq kómek kórsetip jatyrmyz», - dedi Aibek Smadiiarov.
Eske sala ketsek, Gonkong qalasynda narazylar men politsiia arasyndaǵy qaqtyǵys kezinde Qazaqstan azamaty ustalǵany habarlanǵan bolatyn.
«Gonkong qalasy politsiiasynyń qazaqstandyq diplomattarǵa usynǵan aqparatyna sáikes, 18 qarasha kúni narazylyq tanytýshylarmen qaqtyǵys barysynda Qazaqstan azamaty, Gonkong Baptist ýniversitetiniń birinshi kýrs stýdenti Núkpi Ábilqaiyr ustalǵan. Konsýl azamatymyzǵa bardy, onyń densaýlyq jai-kúii turaqty, oń qolynyń shyntaǵynda ustaý kezinde qulaǵan sátte alǵan azdaǵan jaraqaty bar. Ustalý jaǵdaiyna eshqandai shaǵymy joq», - dep atap ótken edi ministrlikten.
