Nevada shtatynyń Atletter komissiiasy (NSAC) orta salmaqtay WBA (Super), IBO, WBC jáne IBF tujyrymdary boiynsha álem chempiony Gennadii Golovkinmen (37-0-1, 33 KO) ótetin kezdesýdiń aldynda doping-synaqtan óte almaǵan meksikalyq boksshy Saýl "Kanelo" Alvareske (49-1-2, 34 KO) qatysty tergeý jumystaryn bastady. Bul týraly Las Vegas Review-Journal basylymyna NSAC basshysy Bob Bennett aitty, dep habarlaidy Vesti.kz.
"Qazirgi ýaqytta jekpe-jek ótpeidi degen resmi málimet joq. Biraq jekpe-jek ótpeý qalýy da múmkin. Biz áli tergeý jumystaryn ótkizemiz. Sheshim shyǵarǵan deiin áli biraz nárseni tekserýimiz kerek. Sondyqtan dál qazir naqty sheshim shyǵarý úshin bizde jetkilikti aqparat joq", - deidi Bennet.
Buǵan deiin Alvarestiń doping-synamasynan klenbýteroldyń bolmashy mólsheri tabylǵany belgili bolǵan edi. Bul preparat adamǵa bulshyqet massasyn ósirýge jáne maidy joiýǵa kómektesedi. Al sporttan tys bul preparat janýarlardyń massasyn ósirýge arnalǵan.
Golden Boy promoýterlik kompaniiasy taratqan málimet boiynsha, "Kanelonyń" aǵzasyna bul preparat zaqymdalǵan et arqyly engen bolýy múmkin ekeni aitylady. Al Alvarestiń ózi bolsa kináli emes ekenin dáleldeý úshin kez-kelgen testten ótýge daiyn ekenin aitty. Golden Boy Promotions promoýterlik kompaniiasynyń prezidenti Erik Gomes bolsa meksikalyq boksshy buǵan deiin onshaqty ret doping-synaqtan ótip, birde bir ret qanynan ruqsat etilmegen dárýmen tabylmaǵanyn jetkizdi.
Eske salaiyq, Golovkin men Alvares arasyndaǵy ekinshi kezdesý 5-mamyr kúni Las-Vegastaǵy T-Mobilev sport kesheninde ótedi. Bul boksshylardyń jekpe-jegi keiinge qalǵan týraly resmi málimet shyqqan joq. Olardyń birinshi kezdesýi de Las-Vegasta ótip, teń aiaqtalǵan edi.
Golovkin men "Kanelonyń" doping-synaqtary "VADA (Dopingke erikti túrde tekserilý assotsiatsiiasy) tekserip otyrady. Boksshylar bul synaqtan Búkilálemdik boks keńesiniń (WBC) "Taza boks" baǵdarlamasy aiasynda tapsyryp otyrady.
