AQSh-tyń Kaliforniia shtatyndaǵy StubHub Center arenasynda ótken kásipqoi boks keshinde qazaqstandyq boksshy Gennadii Golovkin (37-0-1, 33 KO) óziniń amerikalyq qarsylasy Vanes Martirosiandy (36-3-1, 21 KO) ekinshi raýndta nokaýtpen jeńip, óz titýldaryn qorǵap qaldy, - dep habarlaidy "Ult aqparat".
Golovkin birinshi raýndtan bastap shabýyldap, qarsylasyna múmkindik bermedi. Alaida Martirosian da birneshe soqqylaryn daryta aldy. Birinshi raýnd qazaqstandyqtyń basymdyǵymen aiaqtaldy. Ekinshi raýndtyń basynda Martirosian tizerlep otyryp qaldy, alaida dereý turyp, jekpe-jekti jalǵastyrdy. Golovkin taktikasyn ózgertip, qarsylasyn soqqynyń astyna alyp, buryshtan shyǵarmady. Óz kezeginde Martirosian da soqqylar seriiasyn jasaýǵa tyrysyp qaldy. Degenmen de Genanyń aýyr soqqylary Vaneske aýyr tiip, nokaýttan keiin qaita tura almady.
V. Martirosiannyń ulty - armian. Biraq jeti jasynan bastap AQSh-ta turady. Jasy 31-de. Búginge deiin kásibi boksta 40 jekpe-jek ótkizip, 36 ret jeńiske jetken. Úsh aiqasta utylyp, bir márte teń túsken. Sońǵy ret Martirosian eki jyl buryn bokstasqan. Sol kezde ol tóreshilerdiń sheshimi boiynsha Erislandi Laradan jeńilgen edi.
Buǵan deiin qazaqstandyq bylǵary qolǵap sheberi Gennadii men doping daýyna ilikken meksikalyq Saýl «Kanelo» Alvares (49-1-2, 34 KO) arasyndaǵy biylǵy mamyrǵa belgilengen revanshtyń bolmaityndyǵy belgili bolǵan-tyn.
Iaǵni Alvaresten alynǵan doping synamalardyń birinen tyiym salynǵan preparat tabyldy. Osyǵan orai sáýir aiynyń orta kezinde AQSh-tyń Nevada shtaty Atletikalyq komissiiasynyń sheshimimen meksikalyq boksshy Saýl Alvares doping qoldanǵany úshin alty aiǵa sporttan shettetildi.
Jazanyń merzimi aqpannyń 17-sinen bastap esepteledi. Sebebi dál sol kúni Saýl Alvarestiń alǵashqy synamasynan «klenbýterol» atty doping tabyldy. Eki kúnnen keiingi synama da oń nátije kórsetken edi. Odan keiingileri taza bolyp shyqty. Osylaisha, «Kanelo» 17 tamyzǵa deiin barlyq jekpe-jekterden shettetilip otyr.
Sodan keiin, orta salmaqtaǵy WBA Super, WBC, IBF jáne IBO belbeýleriniń iegeri Gennadii Golovkin 5 mamyrda Vanes Martirosianmen kezdesetinin resmi túrde jariialady.
