اقش-تىڭ كاليفورنييا شتاتىنداعى StubHub Center ارەناسىندا ٶتكەن كەسٸپقوي بوكس كەشٸندە قازاقستاندىق بوكسشى گەنناديي گولوۆكين (37-0-1, 33 كو) ٶزٸنٸڭ امەريكالىق قارسىلاسى ۆانەس مارتيروسياندى (36-3-1, 21 كو) ەكٸنشٸ راۋندتا نوكاۋتپەن جەڭٸپ, ٶز تيتۋلدارىن قورعاپ قالدى, - دەپ حابارلايدى "ۇلت اقپارات".
گولوۆكين بٸرٸنشٸ راۋندتان باستاپ شابۋىلداپ, قارسىلاسىنا مٷمكٸندٸك بەرمەدٸ. الايدا مارتيروسيان دا بٸرنەشە سوققىلارىن دارىتا الدى. بٸرٸنشٸ راۋند قازاقستاندىقتىڭ باسىمدىعىمەن اياقتالدى. ەكٸنشٸ راۋندتىڭ باسىندا مارتيروسيان تٸزەرلەپ وتىرىپ قالدى, الايدا دەرەۋ تۇرىپ, جەكپە-جەكتٸ جالعاستىردى. گولوۆكين تاكتيكاسىن ٶزگەرتٸپ, قارسىلاسىن سوققىنىڭ استىنا الىپ, بۇرىشتان شىعارمادى. ٶز كەزەگٸندە مارتيروسيان دا سوققىلار سەريياسىن جاساۋعا تىرىسىپ قالدى. دەگەنمەن دە گەنانىڭ اۋىر سوققىلارى ۆانەسكە اۋىر تيٸپ, نوكاۋتتان كەيٸن قايتا تۇرا المادى.
ۆ. مارتيروسياننىڭ ۇلتى - ارميان. بٸراق جەتٸ جاسىنان باستاپ اقش-تا تۇرادى. جاسى 31-دە. بٷگٸنگە دەيٸن كەسٸبي بوكستا 40 جەكپە-جەك ٶتكٸزٸپ, 36 رەت جەڭٸسكە جەتكەن. ٷش ايقاستا ۇتىلىپ, بٸر مەرتە تەڭ تٷسكەن. سوڭعى رەت مارتيروسيان ەكٸ جىل بۇرىن بوكستاسقان. سول كەزدە ول تٶرەشٸلەردٸڭ شەشٸمٸ بويىنشا ەريسلاندي لارادان جەڭٸلگەن ەدٸ.
بۇعان دەيٸن قازاقستاندىق بىلعارى قولعاپ شەبەرٸ گەنناديي مەن دوپينگ داۋىنا ٸلٸككەن مەكسيكالىق ساۋل «كانەلو» الۆارەس (49-1-2, 34 كو) اراسىنداعى بيىلعى مامىرعا بەلگٸلەنگەن رەۆانشتىڭ بولمايتىندىعى بەلگٸلٸ بولعان-تىن.
ياعني الۆارەستەن الىنعان دوپينگ سىنامالاردىڭ بٸرٸنەن تىيىم سالىنعان پرەپارات تابىلدى. وسىعان وراي سەۋٸر ايىنىڭ ورتا كەزٸندە اقش-تىڭ نەۆادا شتاتى اتلەتيكالىق كوميسسيياسىنىڭ شەشٸمٸمەن مەكسيكالىق بوكسشى ساۋل الۆارەس دوپينگ قولدانعانى ٷشٸن التى ايعا سپورتتان شەتتەتٸلدٸ.
جازانىڭ مەرزٸمٸ اقپاننىڭ 17-سٸنەن باستاپ ەسەپتەلەدٸ. سەبەبٸ دەل سول كٷنٸ ساۋل الۆارەستٸڭ العاشقى سىناماسىنان «كلەنبۋتەرول» اتتى دوپينگ تابىلدى. ەكٸ كٷننەن كەيٸنگٸ سىناما دا وڭ نەتيجە كٶرسەتكەن ەدٸ. ودان كەيٸنگٸلەرٸ تازا بولىپ شىقتى. وسىلايشا, «كانەلو» 17 تامىزعا دەيٸن بارلىق جەكپە-جەكتەردەن شەتتەتٸلٸپ وتىر.
سودان كەيٸن, ورتا سالماقتاعى WBA Super, WBC, IBF جەنە IBO بەلبەۋلەرٸنٸڭ يەگەرٸ گەنناديي گولوۆكين 5 مامىردا ۆانەس مارتيروسيانمەن كەزدەسەتٸنٸن رەسمي تٷردە جارييالادى.
