Orta salmaqta IBF/IBO chempiony Gennadii Golovkinmen jáne ekinshi orta salmaq sanatynda WBA, WBO jáne WBC titýldarynyń iegeri Saýl «Kanelo» Alvarespen jumys isteitin promoýter Eddi Hirn Sports Illustrated-ke bergen suhbatynda biylǵy jyldyń qyrkúiek aiynda olardyń úshinshi jekpe-jegi ótýi múmkin ekenin aitty, dep habarlaidy Sports.kz saity.
Bastapqyda Alvares 18 qyrkúiekte eknshi orta salmaqta álemniń absoliýtti chempiony ataǵy úshin IBF belbeýiniń iegeri Kaleb Plantpen judyryqtasýdy josparlaǵan edi, alaida, olardyń kelissózderi sátsiz aiaqtaldy.
Jýrnalist Kris Menniks Matchroom Boxing basshysynan onyń ornyna GGG jáne «Kanelonyń» úshinshi aiqasyn ótkizý múmkin bola ma dep surady.
«Joq, men bul jekpe-jek qyrkúiekte bolýy múmkin ekenine senbeimin. Gennadii Mýratamen jeltoqsandaǵy aiqasqa daiyndalǵanyn bilemin. Golovkin – «Kanelo» 3 jekpe-jegi ekeýi de ringte óner kórsetkenshe qashan da ózekti bolady, ol kelesi jyldyń mamyr aiynda bolýy múmkin dep oilaimyn. Biraq meniń oiymsha, bizdiń kelesi sheshimimiz «Kanelo» 18 qyrkúiekte judyryqtasa ma, álde biz biylǵy jyly taǵy bir jekpe-jek ótkizip, Plantpen jekpe-jektiń baǵytyn ózgerte me joq pa, sol bolmaq», — dep jaýap berdi Hirn.
Eske sala keteiik, Golovkin men Mýratanyń aiqasy Rojdestvoda (28 jeltoqsanda) ótedi.
