Qazaqstandyq boksshy Gennadii Golovkin (38-1-1, 34 KO) meksikalyq Saýl Alvarespen ótken revanshqa qatysty pikirin bildirip, úshinshi jekpe-jektiń yqtimaldylyǵy týraly aitty, dep habarlaidy QazAqparat Sports.kz saityna silteme jasap.
«Ekinshi aiqasty utqanyma senimdimin. Al tóreshilerdiń jeńisti maǵan bermegeni - meniń problemam emes. Men óz jumysymdy jasadym. «Kaneloǵa» soqqylardy, aýyr soqqylardy kóbirek jasadym. Ol bul joly agressivti qimyldady. Biraq menen beldikterdi alý úshin jetkilikti kúsh salmady. Onyń is-qimyly men úshin kútpegen jaǵdai bolǵan joq. Bizde strategiia boldy. Adamdar meniń jasym týraly aityp jatyr. Aiqasta jeńildim dep oilamaimyn. «Kanelomen» úshinshi aiqasqa kelisemin, bul - naqty. Biraq ol durys sharttarmen uiymdastyrylýy tiis», - dedi Golovkin.
Eske salaiyq, GGG «Kanelo» arasyndaǵy birinshi jáne ekinshi aiqastar Las-Vegastaǵy T-Mobile kesheninde ótti. Eki jekpe-jekte de boksshylardyń eshqaisysy aiqyn basymdyqpen jeńiske jete almady. Alǵashqysy - teń nátijemen, revansh - tóreshiler daýysymen «Kanelonyń» paidasyna aiaqtaldy.
