Qazaqstandyq kásipqoi boksshy Gennadii Golovkin (39-1-1, 35KO) men ýkrainalyq Sergei Derevianchenkonyń (13-1, 10KO) kezdesýinde álem chempionynyń taǵy bir beldigi sarapqa salynady, dep habarlaidy "Ult aqparat".
Boksshylar IBF nusqasy boiynsha bos turǵan orta salmaqtaǵy álem chempiony titýlyna talasatyny buǵan deiin habarlanǵan edi. VKontakte áleýmettik jelisindegi «Qazaqstan kásipqoi boksy» paraqshasyndaǵy málimetke sáikes, atalmysh aiqasta odan bólek IBO vakantty titýly sarapqa salynady. Bul týraly Halyqaralyq boks uiymy óziniń resmi saitynda jariia etken.
«Ortasha salmaqta IBO titýlynyń iegeri dál osy Gennadii Golovkin bolatyn. Ol titýl 2011 jyldan 2018 jylǵa deiin GGG-de tiesili edi. Sondai-aq, qazaqstandyq boksshy 2010 jyldan 2018 jylǵa deiin WBA chempiony, 2016-2018 jyldary aralyǵynda WBC chempiony boldy», - delingen habarlamada.
IBO titýly kásipqoi bokstaǵy mártebesi boiynsha besinshi titýl sanalady. Máselen, álemniń absoliýtti chempiony ataǵy úshin tek WBC, WBA (Super), WBO jáne IBF beldikterine ie bolý kerek.
Eske sala ketsek, Golovkin-Derevianchenko jekpe-jegi 5 qazanda Niý-Iorktegi (AQSh) «Madison Square Garden» arenasynda ótedi. Boksshylar eki titýl úshin talasady.
