Ulttyq qor qarajatyn basqarýdyń tásilderin qaita qaraý qajet. Bul týraly QR Parlamenti palatalarynyń birlesken otyrysynda Respýblikalyq biýdjettiń atqarylýyn baqylaý jónindegi esep komitetiniń tóraiymy Natalia Godýnova aitty, dep habarlaidy QazAqparat.
«Ósip kele jatqan memlekettik borysh eldegi makroekonomikalyq turaqtylyq táýekelderin týǵyzady. Buǵan qarsy turatyn qaýqar áli bar. Biraq qabyldanǵan boryshtyq mindettemeler boiynsha bizdiń naqty tujyrymdalǵan óz esebimiz bolǵanyn, boryshty qashan, qandai kózderden jáne qandai kólemde óteý josparlanýyn qalar edik. Jáne de bir-úsh jylǵa emes, kem degende 10 jylǵa eseptelýi kerek. Bul jerde aiqyndyq pen ashyqtyq qajet», - dedi Natalia Godýnova.
Sondai-aq ol memlekettik organdardyń aǵymdaǵy qyzmetin iske asyrý, halyqaralyq konsýltanttardy tartý jáne sheteldik tájiribeni zerdeleý úshin syrtqy qarjylandyrý kózderin tartý praktikasyn joiý qajettigin basa aitty.
«Bizde osy mindetterdi iske asyrý úshin ózimizdiń qarjylyq jáne adami resýrstarymyz jetkilikti. Syrtqy qaryzdy tiimsiz tartqany jáne paidalanǵany úshin, sondai-aq olardy ýaqtyly igermegeni ári kúshin joiǵany úshin derbes jaýaptylyqty qatańdatý talap etiledi. Bul jóninde depýtattar da aitqan bolatyn», - dedi komitet tóraiymy.
