Foto: facebook.com/kaken.kamzin
Belgili professor Káken Qamzin páterinen qalai aiyrylǵanyn baiandap, alaiaqtardyń áreketi týraly aityp berdi, dep habarlaidy Ult.kz.
Jaqynda alaiaqtardyń qurbany bolyp, jalǵyz baspanasynan aiyrylǵan professor Káken Qamzin oqiǵanyń mán-jaiyn áleýmettik jelide bólisti.
Esterińizge sala keteiik, jaqynda Káken Qamzinniń jalǵyz baspanasynan aiyrylǵany jaily aqparat taraǵan edi.
Derekkózderdiń habarlaýynsha, professorǵa beitanys adam «Energosbyt» mekemesiniń qyzmetkeri retinde habarlasyp, onyń jeke derekterin surap alǵan. Káken Qamzin oǵan óziniń JSN nómirin bergen.
Odan keiin ózin Ulttyq qaýipsizdik komitetiniń qyzmetkerimin dep tanystyrǵan taǵy bir adam habarlasyp, professordyń jeke derekteri alaiaqtardyń qolyna túskenin aitqan. Ol tez arada úidi satý qajettigin eskertip, eger ýaqytynda satylmasa, jaǵdaidyń qiyndaitynyn jetkizgen. Osylaisha, professor páterin satý arqyly alaiaqtardyń qolyna aqsha berip qoiǵan.
Professordyń aitýynsha, ol úsh bólmeli páterin nebári 31 million teńgege satqan.
Káken Qamzin búgingi jazbasynda 1983 jyldan beri turyp kele jatqan úiinen aiyrylyp qalatynyn ashyq aitty.
«Qurmetti jamaǵat, Facebook-degi qadirli dostar! Osy jazbany jazýǵa endi ǵana shamam keldi. Aýyr psihologiialyq soqqydan esimdi endi jinadym. Meniń basyma túsken jaǵdai týraly áleýmettik jelidegi jazbalardan kópshilik habardar shyǵar. Kiberalaiaqtardyń qurbany bolǵanym shyndyq», – deidi professor.
Onyń sózinshe, bul – qarapaiym internet alaiaqtyq emes, jaqsy uiymdastyrylǵan, júieli qylmystyq shema.
Mamandardyń aitýynsha, qylmyskerler tek tsifrlyq tehnologiialardy ǵana emes, psihologiialyq áser men gipnoz áleýetin, sondai-aq ártúrli mekemelerdegi jaldamalylardyń derekterin óte sheber qoldanady. Qazirgi tańda quqyq qorǵaý organdary bul isti jan-jaqty tekserip jatyr, – deidi professor.
Káken Qamzin bul oqiǵany basqalarǵa sabaq bolsyn dep jariialaǵanyn atap ótti.
«Aitylatyn da, aitylmaityn da nárseler bar. Osyndai zaýal dál meniń basyma túsedi dep kim oilaǵan? Ishtei Alladan budan keiin de ómirim uzaq bolsyn, júregim jigerli, boiym qýatty bolsyn dep tilep júrmin. Endi naqty aitsam, 1983 jyldan beri turyp kele jatqan, bala-shaǵamdy ósirgen baspanamnan airylǵaly otyrmyn. Birsypyra adamdar shyn nietpen janashyrlyq bildirýde, ásirese shákirtterim. Olarǵa myń da bir raqmet! Adamgershiliktiń ólshemi de osy emes pe? Bul jazbamdy sizderge sabaq bolsyn, aqparattyq alańdaǵy jyltyldaǵan, jarqyraǵan jazbalarǵa kóp sene bermeńizder degen oimen jariialap otyrmyn. Aman bolyńyzdar, aǵaiyndar!» – dedi professor.
