Nemis kompaniialary Qazaqstan 2060 jylǵa qarai josparlap otyrǵan klimattyq beitaraptyqqa qol jetkizýge mańyzdy úles qosa alady. Sondai-aq, Qazaqstan Germaniianyń «Jasyl Ortalyq Aziia» bastamasynda negizgi ról atqarady. Bul týraly GFR-diń Shyǵys Eýropa, Kavkaz jáne Ortalyq Aziia elderimen yntymaqtastyq máseleleri jónindegi ýákili Mattias Liýtenberg málim etti, dep habarlaidy QazAqparat tilshisi.
«Germaniia men Qazaqstan umtylyp otyrǵan ekonomikany dekarbonizatsiialaý da - mańyzdy oqiǵa. Tájiribege, turaqty investitsiiaǵa jáne zamanaýi tehnologiialarǵa bai nemis kompaniialary Qazaqstan 2060 jylǵa qarai josparlap otyrǵan klimattyq beitaraptyqqa qol jetkizýge mańyzdy úles qosa alady. Sondai-aq Qazaqstan Germaniianyń «Jasyl Ortalyq Aziia» bastamasynda negizgi ról atqarady. Onyń kómegimen biz klimattyń ózgerýi jáne aimaqtaǵy qaqtyǵystardyń aldyn alý boiynsha transshekaralyq yntymaqtastyqty kúsheitkimiz keledi», - dedi Mattias Liýtenberg QR SIM-de ótken baspasóz máslihatynda.
Sonymen qatar nemis ýákili Qazaqstanǵa jasalǵan sapardyń erekshe ekenin jetkizdi.
«Ekijaqty yntymaqtastyǵymyzdy aldaǵy 30 jylda odan ári damyta ári tereńdete túsýge negiz kóp. Qazaqstannyń syrtqy ister ministrligi, atap aitqanda ministrdiń orynbasary myrza, qonaqjailyǵyńyz úshin taǵy da alǵys aitamyn. Osy aitýly, erekshe kúni Qazaqstanda bolǵanyma óte qýanyshtymyn», - deidi meiman.
