Germaniianyń soltústigine «Ileniia» daýyly jaqyndap qaldy, elde joǵary daiyndyq rejimi saqtalýda, dep habarlaidy QazAqparat Deutsche Welle saityna silteme jasap.
Nemis meteorologiialyq qyzmetiniń (DWD) derekterine sai, Germaniianyń soltústigindegi Garts taýynyń shyńynda saǵatyna 152 kilometr jel tirkeldi.
DWD Soltústik Rein-Vestfaliia jáne Meklenbýrg-Aldyńǵy Pomeraniiada qatty jel týraly eskertý jasady. Onymen qosa, Shvartsvald siiaqty Ońtústik Germaniianyń taýly aýdandarynda da aýa raiynyń nasharlaityny habarlandy.
Meteorologiialyq qyzmettiń boljamyna sai, Soltústik Rein-Vestfaliiadaǵy Zaýerland pen Gartsta jaýyn-shashyn tolassyz jaýmaq. Bilik oryndary Berlin men Gambýrg siiaqty iri qalalarda saiabaqtar men ormandarǵa barýdan bas tartýǵa shaqyrdy. El boiynsha órt sóndirý qyzmetteri apat bolǵan jaǵdaida jumysqa kirýge ázir.
«Daýyl Germaniianyń soltústik-batysynan bastalyp, ońtústik-shyǵysyna qarai eldiń ortalyǵyna deiin jyljidy», - dep túsindirdi DWD meteorology Adrian Lizer.
Germaniianyń Deutsche Bahn temirjol qyzmeti Twitter-de aýa raiynyń nasharlaýy saldarynan poiyzdardyń keshigip jatqanyn habarlady.
Lufthansa áýe kompaniiasy da óz saitynda ushaqtardyń keshigýi týraly habarlap, jolaýshylardy sapar aldynda reis kestesin qadaǵalaýdy shaqyrdy.
Germaniianyń halqy kóp Soltústik Rein-Vestfaliia jerinde mektepter jabyldy. Tómengi Saksoniiada da sabaq bolmaidy.
